30. 1. 2020: Пеллеґріні: „Меншыны ся не мусять бояти, постараме ся о них.‟

Народностны меншыны на Словакії ся не мусять бояти, же о них не буде постарано, покля ся до Народной рады Словацькой републікы по фебруаровых вольбах не дістане жадна політічна партія, котра просаджує меншынову політіку.

По їднаню словацькой влады, котре одбыло ся 29-го фебруара 2020-го року, то декларовав председа влады Петер Пеллеґріні. За ёго словами буде постарано о меншыны єднако, як і о вшыткых пбчанів Словацькой републікы. Інформовала о тім пресаґентура TASR.

Вшыткым належать єднакы права

„Не думам, же покля ся нияка партія заступаюча мадярьску меншыну не дістане до парламенту, та бы то была траґедія. Буде о них постарано так, як є о них постарано і теперь,“ повів премєр з тым, же за ёго словами участь такой партії в парламентї на то не має ани выразный вплив.

Пеллеґірні підкреслив, же без огляду на народность, належать вшыткым обчанам Словакії вшыткы выгоды і права повноцїнного обчана країны. „Постараме ся о них, як о каждого єдного обчана Словацькой републікы, без огляду на то, де жыють, де ся народили,“ повів на пересконференції премєр.

Окрем іншого спомянув, же ани Русины у владї не мають никого, но на выходї влада, кедь може, та помож. Подобно суть на тім за ёго словами Чехы ці іншы меншыны.

„Мадярьскы“ партії в огрожіню

Парламентны вольбы на Словакії будуть проходити 29-го фебруара 2020-го року і кандідує в них 25 політічных субєктів. Кедь премєр бісїдовав о партіях „заступаючіх мадярьску меншыну“, думав тым головно днесь владну партію Most-Híd і партію Мадярьска комунітна соналежность (Magyar Közösségi Összefogás – Maďarská komunitná spolupatričnosť), котра выникла як волебна партія веце меншых мадярьскых етнічных партій.

Покля Most-Híd не рїшыть лем мадярьску меншыну, але меншынову політіку вобще, докінця має і русиньску платформу, Мадярьска комунітна соналежность є заміряна на словацькых Мадярів. Проблемов обидвох партій є, же довгодобо їм сондажи міряють преференції під пять процент, котры суть потрібны про вступ до парламенту.

Покля ани єдна партія не перейде, буде то першыраз в історії незалежной Словакії, што мадярьска меншына не буде мати „своїх“ посланцїв у парламентї.

Шансу чують іншы партії

Но днесь не представлюють лем тоты два політічны субєкты партії, котры репрезентують меншынову політіку. То, же обидві довогодобо суть під граніцёв вступу до парламенту, схосновали іншы політічны партії, котры чують шансу підхопити меншыновых волічів.

У своїм проґрамі рїшыть народнотны меншыны коаліція PS-Spolu. Партії Progresívne Slovensko i Spolu першыраз ішли в коаліції до европскых волеб у 2019-ім роцї, і стали втогды другым найміцнїшым субєктом у вольбах по владній партії Smer-SD. Днесь ся в сондажах рушають коло 10-ох процент, што є менше, як здобыли у евровольбах. PS-Spolu як коаліція мусить мати мінімално 7 процент, жебы войти до парламенту.

З проґрамом про меншыны, в котрім є і окремо розробленый проґрам про русиньску меншыну, приходить і партія Sloboda a Solidarita. Тота, хоць в сондажах находить над 5-ма процентами, є так само в огрожіню, кедьже сондажы мають свої штатістічны хыбы і наконець може і она зістати перед бранами парламенту.

Остатнї політічны субєкты будь меншыны у своїм проґрамі нияк не рїшають, або їх мають спомянуты пару речінями без конкретных пропозіцій даякых рїшінь.

Петро МЕДВІДЬ, ЛЕМ.фм