3. 9. 2020: Добило сердце Ольґы Прокоп

3-го септембра 2020-го року у віцї 79 років добило сердце Ольґы Прокоп, вызначной културно-сполоченьской діятелькы меджі Русинами Підкарпатя, але і цїлой Карпатьской Руси. Ольґу Прокоп мож было знати наприклад із ґрупы Тріо Червена Ружа, котре записало албум Русь Пудкарпатська Сята.

Так само вела дїтячій ансамбель „Бабчина співаночка‟, співала і в ансамблі „Чинадіївка‟. Была знаменитов орґанізаторков културных подій.

Ольґа Прокоп народила ся 6-го септембра 1940-го року в селі Крива, недалеко Хусту, до родины Кіріла Прокопа, русиньского діятеля і політіка, котрый быв і в депутації, яка пришла за презідентом Томашом Ґаріком Масаріком зо жадостёв о припоїня русиньскых теріторій до складу Чехословакії. Кіріл Прокоп быв одсудженый в Другім мараморошско-сіґетьскім процесї, в ктотрім судили православных Русинів. Почас 1-ой Чехословацькой републікы быв членом чехословацького парламенту. По анексії Підкарпатьской Руси Совєтьскым союзом быв знова судженый і арештованый. І вдяка тому Ольґа Прокоп пережыла тяжке дїтинство, коли зістала родина лем з мамов і не мали право мати властне обыстя. Но тоты складны часы єй не зломили.

Ольґа Прокоп была професіоналнов културнов і довгорічнов сполоченьсков діятельков. Роками учіла і русиньскый язык а културу в русиньскых недїльных школах на Підкарпатю, котры орґанізовав русиньскый меценат з Канады Штефан Чепа. Прямо діяла або сполупрацовала в многых музичных колекрівах. Акцентовала нелем артістічны, но і патріотічны а выховлюючі аспекты у своїй творчости.

27-го мая 2016-го року почас ІХ. Біенале лемківской/русиньской културы в Криніцї была выголошена за лавреатку Премії Василя Турока-Гетеша, котру передавать Світова рада Русинів. Як втогды інформовав председа Світовой рады Штефан Лявинець, оцїнена была за досягнены вызначны резултаты при розвитку, популарізації і презентації русиньской културы у вшыткых їй аспектах. Ольґа Прокоп жыла в Чинадієві. Вічная память!

Петро МЕДВІДЬ, ЛЕМ.фм, языкова управа: ред. АРК в СР.