3. 6. 2016: Третє засїданя языковой комісії

2. юна 2016 в просторах Інштітуту русиньского языка і културы Пряшівской нуніверзіты в Пряшові одбыло ся третє засїданя узшого кругу языковой комісії в зложіню: доц. ПгДр. Василь Ябур, к. н.; доц. ПгДр. Анна Плїшкова, ПгД.; ПгДр. Кветослава Копорова, ПгД. і Мґр. Зденка Цітрякова.

 

Комісія продовжовала у своїм проґрамі з попереднїх засїдань. Главнов темов были дакотры корекції правил у морфолоґії (напр.: алтеранція при склонёваню дакотрых назывників, конъюґація часослов із вставным -л-, правопис дакотрых присловників, склонёваня властных мен...), накілько ІРЯК ПУ приправлює на выданя высокошкольскый учебник Морфолоґія і словотворїня, котрый выйде кінцём рока 2016 в рамках проєкту KEGA.

До далшого засїданя, планованого на місяць септембер 2016, членове комісії приправлять свої коментарї ід пропонованым змінам і приготовлять далшы матеріалы на корекцію правил правопису.

 

ПгДр. Кветослава КОПОРОВА, ПгД.,

коордінаторка Языковой комісії при ІРЯК ПУ,

фотка: А. Вєтошевова.