3. 5. 2021: На Словакії зачало асістоване списованя жытелїв. Є важным про меншыны, акцентує Буковскый
На Словакії 3-го мая 2021-го року зачало асістоване списованя жытелїв. Тото списованя буде до 13-го юна 2021-го року. Є главно про діґітално вылученых жытелїв, котры ся не годны были з будьякых причін самосписати од 15-го фебруара до кінця марца 2021-го року.
Асістоване списованя, значіть списованя за помочі асістента, котре є главно про сеніорів, людей без інтернету, ці марґіналізованы ромскы ґрупы, забезпечіть кажде місто і село. Плановане было, же буде проходити вєдно з електронічным самосписованём, но з причіны пандемії го пересунули.
„Асістоване списованя буде тырвати шість тыжднїв і буде проходити на цїлій теріторії Словацькой републікы. Покля бы ся в дакотрых окресах ці краях згіршыла пандемічна сітуація, председа Штатістічного уряду Словацькой републікы може списованя перерушити,“ повіла про аґентуру TASR говоркыня про Списованя жытелів, домів і квартелів 2021 Ясміна Штаудер.
Помагати будуть асістенты
При асістованім списованю поможе людям мобілный або стаціонарьный асістент. Самосправа на теріторії міст і сел зряджує контактне місце, або веце такых місць. Там має быти к діспозіції техніка і стаціонарьный асістент. Контактны місця не суть повязаны з тырвалым перебыванём жытеля, може їх навщівити будьхто і будьде.
Покля чоловік не може прийти до контактного місця, може собі ку собі домів закликати через телефонічный центер мобілного асістента. Жебы не приходило ку подводам, Штаудер припоминать, же нихто не ходить з асістентів проактівно дуркати на дверї, але асістента собі треба покликати. Так само має асістент леґітімацію, котру вкаже при контактї з чоловіком, котрый собі поміч покликав.
Буковскый: Асістоване списованя є важным про меншыны
На Словакії ся в першім в історії електронічнім списованю самосписало 86 процент жытелїв. Значіть, іщі все зіставать доста велике проценто тых, котры можуть овпливнити резулаты списованя.
І зато ку зачатку асістованого списованя дав выголошіня і уповномоченый влады Словацькой републікы про народностны меншыны Ласло Буковскый.
„З дотеперішнїх резултатів видиме, же про актівістів приходить досправдова робота, але моёв повинностёв є звернути увагу старостів і пріматорів на то, жебы были максімално напомічны главно про сеніорів. В тій віковій катеґорії бывать заступлїня членів народностных меншын векше, як є словацьке середнє чісло, зато є про окремы народности, як і про успіх списованя і точны даны потрібне, жебы селами і містами становлены асістенты мали максімалну довіру містных жытелїв і тоты їм признали свою народность,“ написав у выголошіню уповномоченый.
„Лем слободно признаны даны прозрадять о нашій країні найвеце детайлів і розкрыють їй богату културну розмаїтость,“ закінчує уповномоченый.
Петро МЕДВІДЬ, ЛЕМ.фм, языкова і ґрафічна управа: ред. АРК в СР.
