3. 5. 2019: Юрко ХАРИТУН: На берегах чеканя, Рімы, Увидиш (Стихы)

На берегах чеканя

Приходить час
умыти очі росов
Зацвине зась наша любов
Нашы сны
як совы у ночі
не будуть спати
     будуть лїтати
Іщі треба контуры недовіры
               отесати
Сердце буде быти
в своїх інтервалах
як колись надале

 

Рімы

У нашій долинї
на черешнях росли рімы
Лем збирай до зайды!
По татраньскых горах ходжу
а ту їх не найду
Не хочу їх велё
Не хочу до жменї
ани до кешенї
Може на параду
я бы їх хотїв
до моїх стишків
Іщі днесь піду за ними
аж на Полонины

 

Увидиш

Стишкы до збіркы вложу
Колячім дротом
Як іглы їжака їх не звяжу
На твої груди приложу
Зачуєш сама
А я рукы кладу на твої груди
хоць колячі
Отвориш очі
і увидиш
же не плачу

Тексты суть з Літературного конкурзу Марії Мальцовской 2018
 

Script logo