3. 5. 2016: Реконштрукція русиньского музею бы могла зачати у 2017-ім роцї

Словацькый народный музей – Музей русиньской културы в Пряшові выиникнув 1-го януара 2007-го року на основі рїшіня Міністерства културы Словацькой републікы. Наперед быв у арендованых комерчных просторах. Кінцём 2011-го року музей переводом маєтку із Міністерства обраны Словацькой републікы дістав бывшы касарнї, чім ся здобыла будова, котра має служыти як просторы музею.

Здобытя новых просторів значіло і то, же музей быв до децембра 2013-го року про людей цалком запертый. Од того часу є одкрытый, но фунґує в обмеженім режімі. Напрік тому музей понукать дочасны і штири сталы експозіції. Лем недавно прибыла експозіція, котра документує Підкарпатьску Русь у 30-ых роках 20-го столїтя.

Бывшы касарнї суть творены трёма обєктами, із котрых два суть із 19-го столїтя і не были довго реконштруованы. Так само не суть просторы приготовлены на ґалерійне і музейне діятельство. Од здобытя новых просторів директорка Словацького народного музею – Музею русиньской културы Ольґа Ґлосікова має намагу здобыти фінананції на проєктову документацію і наслїдну реконштрукцію будовы. Як повіла директорка Ґлосікова  в остатнїх днях про словацьку пресову аґентуру SITA, думать собі, же перша фаза реконштрукції бы могла зачати у 2017-ім роцї.

Ставебный замір є подля слов Ґлосіковой в сучасности на Міністерстві културы Словацькой републікы, котре є зряджователём Словацького народного музею і вшыткых ёго оддїлїнь. Міністерство вырїшыть і приділіня 210-ёх тісяч евр потрібных на выпрацованя проєктовой документації, котра детайлно встановить роботы і кошты, і без котрой не може зачати ся реконштрукція. „У ідеалнім припадї бы ся перша із пятёх етап обновы центра музею могла зачати на будучій рік,“ інформовала Ґлосікова.

„Намагов музею є штонайскорїше зачати із реконштрукчныма роботами в інтерьєрї і ектерьєрї будовы, жебы вытворити условії про іншталацію росшыреных експозіцій і новых выставок, котры бы презентовали жывот і традіції Русинів. Зреконштруованы просторы понукнуть бібліотекарьскы, бадательскы ці архівны службы заінтересованым, як і різны културно-освітнї події про вшыткы віковы катеґорії,“ обіцять офіціалный інтернетовый сайт музею.

П. М.

Script logo