3. 3. 2016: Русиньска комісія рекомендовала підпорити 122 проєктів

Остатнї два тыжднї на Словакії засїдають комісії окремых народностных меншын, котры посуджують проєкты поданы на 2016-ый рік. Русьньска комісія засїдала в днях 1-го і 2-го марца 2016-го року.

Про русиньску народностну меншыну было того року в рамках проґраму Уряду влады Словацькой републікы під назвов Култура народностных меншын 2016 придїленых 294 032 €. Русиньска комісія посуджовала 160 поданых проєктів, із котрых рекомендовала підпорити 122. Комісія є порадным орґаном, значіть, вердікт комісії о вышцї підпоры проєкту іщі не мусить быти дефінітівный.

Уряд уповномоченого влады про народностны меншыны і етнічны ґрупы ся на своїм сайтї хвалить і рекордно скорым часом підписованя і публікованя першых договорів. Покля комісії зачали засїдати в минулім тыждню, уж в пятніцю, 26-го фебруара, были першы договопры опублікованы на Централнім реґістрї договорів, што є сіґналом, же жадателї, котрых договпоры суть публікованы на реґістрї, можуть в найблизшых днях чекати грошы на свої проєкты. – Моментално бы мало быти публікованых 5 договорів на підпору 18-ёх проєктів у цїлковій сумі 100 478 €, – доповнює Уряд уповномоченого.

Русиньску комісію про посудожваня поданых проєктів творить пять людей, котры были підпорованы орґанізаціями діючіма в русиньскім русї і пять номінантів Уряду влады СР.

 П. М.