3. 3. 2016: 34. семінар карпаторусиністікы

24. фебруара 2016 в засїдалнї Consilium maius Ректорату Пряшівской універзіты ся одбыв першый в тім роцї научный семінар карпаторусиністікы. Як традічно, першы семінары в роцї, котры орґанізує Інштітут русиньского языка і културы ся вяжуть з літературов. На семінарю были прочітаны два рефераты на выданы книжны публікації – невеликый прозовый твір Петры Ткачовой-Семанцёвой і книжный дебут Меланії Германовой.

Мґр. Івана Сливкова, ПгД. з Інштітуту україністікы і середнёевропскых штудій ФФ ПУ в Пряшові приправила реферат iз темов Меланія Германова: Радость і поучіня – нелем про дїти.

Мґр. Михал Павліч з Центра языків і култур народностных меншын – Інштітуту русиньского языка і културы ПУ в Пряшові приготовив реферат iз темов Петра Семанцёва: Россыпаны рядкы.

В рамках семінара была і презентація найновшых публікацій з карпаторусиністікы. Представлена была белетрістічна і одборна література, міджі іншыма і выступный зборник рефератів iз минулорічного на Пряшівскій універзітї 4. Mіджінародного конґресу русиньского языка під назвов Русиньскый літературный язык на Словакії – 20 років кодіфікації, але і барз цїнна і унікатна моноґрафія – Ґраматіка русиньского языка. Презентція літературы была звязана з автоґраміадов авторів книжок.

Мґр. Зденка ЦІТРЯКОВА,

докторандка Центра языків і култур народностных меншын –

Інштітуту русиньского языка і културы ПУ.