3. 12. 2020: Костельникова осїнь тот рік онлайн

Вже 27-ый річник літературного фестівалу войводиньскых Русинів під назвов Костельникова осїнь тот рік з причіны пандемії буде проходити онлайн. Вырїшыв о тім орґанізачный комітет фестівалу. Інформовала аґентура Рутенпрес.

Фестівал буде тот рік проходити почас трёх днів од 10-го аж до 19-го децембра і буде го мож позерати на фанпейджі Дому културы Руськый Керестур на сітї Facebook.

Як інформує Рутенпрес, 10-го децембра буде презентовати ся література про дїти, і початок є напланованый на 10.00 год. Представлены будуть дїтячі книжкы од Сашы Палєнкаша, Оленкы Жівковічовой, Даніелы Тамаш ці Любицї Фа Гарді.

18-го децембра од 14.00 год. будуть представлены книжкы прозы і поезії про дорослых в авторстві Юліана Тамаша, Славка Виная, Славка Романа Ронда, але онлайн публіка буде мати можность познакомити ся із выданём історічных текстів Гавриїла Костельника. Третя часть літературного фестівалу, котра буде в онлайн высыланю 19-го децембра, буде присвячена молодежи і їх выданям.

Петро МЕДВІДЬ, лем.фм, языкова управа: ред. АРК в СР.