3. 10. 2024: Памятник чехословацькым воякам ґенерала Свободы на поштовій знамцї

Місто Свідник має новы поштовы маркы, на котрых є Памятник 1-го Чехословацького армадного корпусу на Дуклї. Інформовало о тім місто на своїм офіціалнім вебсайтї.

Як мож прочітати в поданій інформації, місто Свідник перед трёма роками пожадало веджіня Словацькой пошты і Міністерство транспорту Словацькой републікы о вытворіня реґіоналной поштовой знамкы. Єднов із причін той жадости было, жебы дати можливость домашнїм і турістам „загнати Свідник до світа,“ пише ся на сайтї.

Нова поштова знамка є повязана із 80-ов рочніцёв Словацького народного повстаня і Карпато-дукляньсков операціёв, котра значно овпливнила історію того реґіону. Обидві рочніцї припоминають ся у 2024-ім роцї.

„Памятник 1-го Чехословацького армадного корпусу, котрый находить ся на знамцї, є єдным із найвызначнїшых памятных місць в нашім реґіонї, а єдночасно є і Народнов културнов памятков.“

„Тота поштова знамка присвячена є памяти тых, котры боёвали за слободу і мір в тых важных історічных подїях. На поштовы знамкы дістануть ся лем цїлообщественно найвызначнїшы мотівы, особности і дії. Мы горды, же Карпато-дукляньска операція і Словацьке народне повстаня суть єдныма з них,“ пише ся на сайті міста.

Цїна єдной znamky є єдно евро, і мож їх купити в Турістічнім інформачнім центрї у Свіднику, зато може мати і зберательску вартость.

Памятник 1-го Чехословацького армадного корпусу ґенерала Людвіка Свободы, в котрім боёвали і Русины, находить ся в катастралній теріторії русиньского села Вышнїй Комарник. Быв збудованый у 1949-ім роцї.

Памятнику доміновала монумелнтална скулптура чехословацького вояка. Пізнїше вояка одсторонили і зничіли, а на ёго місце дали скулптуру з назвов Жалїю, в рамках котрой жена дяковала совєтьскому воякови. При нагодї 70-ой рочніцї Карпато-дукляньской операції скулптура чехословацького вояка вернула на своє місце на Дуклї, нажаль, уж лем копія.

Памятник быв выголошеный за Народну културну памятку у 1961-ім роцї.

Петро МЕДВІДЬ, ЛЕМ.фм, языкова і ґрафічна управа: АРК в СР.