3. 10. 2020: Проґрам Театру Александра Духновіча в Пряшові на місяць октобер 2020

7-го октобра 2020

Детектор лжи (Велика сцена, 19.00 год.)

Повісте собі, же о манжелстві знате вшытко? Досправды то так є? Або… може о манжелстві не знаме абсолутно ніч? І манжелство може быти єдна велика незнама… А притім прекрасна комедія! Находиме ся в обывачцї єдного класічного панелакового квартелю. Панї Надежда не знать найти одповідь на вопрос: Де мій муж Борис скрыв выплату? І так собі на поміч закличе домів гіпнотізера. Має пояснити дїла, котры суть на першый погляд баналны. А пізнїше і фаталны. Бо уж по хвілї знайде ся меджі небом і землёв. Лїпше повіджено – посеред таємніць тридцятьрочного манжелского одношіня. Тадь хто бы ся сперав покушіню спознати істинну правду і скрыты світы свого цїложывотного партнера? Нихто. І втогды ся іщі лем почнуть дїла! Минулость шокує нашых героїв, метать їх до неочекованых сітуацій. Но публіка ся барз файнї бавить! Та ці то в жывотї аж таке вітязство? Дізнати ся о нашых близкых досправды вшытко? Тверду правду? Як скінчіть тота сеанса несподїванок? Подарить ся загасити тот ґротесковый пожар манжелскых боротьб? Буде годен в многім простодушный гіпнотізер втечі із пазурів манжелского абсурду? Так лож, як і туга розкрыти правду, єдно і друге може быти про нас солодков наркотіков, котра ся за секунду змінить на смертну отрову. Успішнїй комедії зо сучасности домінують брілантны акторьскы выступы протаґоністів русиньского театру. Суть поставлены на текстовій і сітуачній перемінливости. На бавлїню ся. На дінаміцї акторьской кооперації, іскривости словных несподїванок. Значіть! Театралный вечур повный доброй забавы, усміху, котрый вам з часу на час замерзне на ротї, сміху і радостного обчутя ся може зачати!

 

14-го октобра 2020

Фараоны (Велика сцена, 19.00 год.)

Фунґованя колхозу, в котрім панують класічны стереотіпы о дїлїню роботы на хлопску і женьску, нарушыть єдного рана вість і вычеряню позіцій. Там, де стояли хлопи, будуть жены і навспак. Што ся стане, кедь хлопи-функціонарї, нараз будуть женами, котры ся старають о обыстя? Комедія Фараоны приносить гуморну і выдарену моделову сітуацію на тему перевернутя сполоченьскых роль.

 

23-го октобра 2020

І мудріяш ся даколи пошпотить (Велика сцена, 19.00 год., 1-ша премєра)

„З дурных людей не треба ся высмівати, треба выхосновати їх слабости.“ Ґлумов знать, як здобыти собі поставлїня. Днесь є важным досягнути го посередництвом тых правилных людей. Ґротескова історія о хамтивости і компліментах, в котрій молодый Ґлумов рихтує ся карьєрно поступити з выбрушеным, богатым языком і софістікованыма бісїдами. По стопятьдесятёх роках є пєса Александра Николаєвіча Островского іщі все актуална і зображує днешнїй способ комунікації тых „найвысшых“, де тоты „малы“ знають то добрї выхосновати.

 

28-го октобра 2020

І мудріяш ся даколи пошпотить (Велика сцена, 19.00 год., 2-га премєра)

 

П. М., лем.фм, языкова управа: ред. АРК в СР.