3. 10. 2018: Премєра гры Обіцянкы у Театрї А. Духновіча в Пряшові
За ославу драматічного уменя означів режісер Матуш Ольга (на фотцї) рїшіня, котре было поужыте в приправованій премєрї інсценації названой Обіцьнкы на три способы в Театрї Александра Духновіча (ТАД) у Пряшові. Позерателї почас єдного вечора увидять три подобы сценічного спрацованя єдного і того самого тексту класіка словацькой драматічной творчости Йозефа Ґреґора Таёвского під назвов Обіцянкы. Перша премєра в новій театралній сезонї 2018/2019 приправує ся на пятніцю, 5. октобра 2018, на великій сценї ТАД у Пряшові.
М. Ольга на вчерашнїй пресконференції ку премєрї дале інформовав, же при інценованю Таёвского тексту (1898) выбрав три способы – прсіхолоґічно-реалістічный, аматерьскый і постмодерный (з додатком – безгранічный). Тота ідея ся зродила перед выше роком і наконець по выше місячній приправі здобыла конкретну подобу. Таёвского Обіцянкы суть якбы передзвістёв ёго може найславнїшого тексту – Женьскый закон. „Уж ту Таёвскый добрї розробив характеры зрілых жен. Єм рад, же Светлана Шковранова і Людміла Лукачікова своїм майстровством тоты ролї ожывлюють і в нашій грї.‟ Л. Лукачікова підкреслила, же не выхабила дотеперь ани єдну гру, котру М. Ольга режіровав за довгы рокы сполупраці з ТАД. Режісер додав, же ся чує „складовов частёв того унікатного театралного драматічного колектіву‟, котрый єдыный професіоналный на Словакії, котрый грає по русиньскы. Творы словацькой класічной драмы М. Ольга зачав у ТАД режіровати од року 1996, а то інтерпретаціёв Кукучінового тексту Непробуджены – і є їх уж выше десяткы. Перед Обіцянками была послїднёв стрїчов режісера і драматічного колектіву ТАД робота над текстом Корчма під зеленым стромом од Петра Ковачіка.
Умелецькый ведучій драматічного колектіву Любомір Міндош думать собі, же кедь почас приправы інсценації єй герцї ся забавляли, так будуть ся забавляти і позерателї, а то нелем на домашнїй сценї, але і на сценах у нашім реґіонї. Бо ТАД грає у Пряшові лем раз до тыждня (у середу), інакше обсолвує выїзды по селах главно северовыходной Словакії. У септембрї їх колектів одограв 12 такых выїздовых выступлїнь, а в октобрі буде мати 10 такых выступлїнь.
Цїлый інсценачный колектів і з режісером суть гостями ТАД – пропозіція сцены є дїлом Ярослава Доубравы, костімы приправила Катка Ольгова, музику – Павол Янїчек. У пєсї грають: Светлана Шковранова, Зденка Кваскова, Василь Русиняк, Людміла Лукачікова, Ладіслав Ладомиряк, Михал Куцер, Іґор Латта, Мартін Оравець і Владимір Рогач.
Інсценація Обіцянкы на три способы має підназву Образ з народу в єдній дії на три способы, текст котрой із словацького языка переклав до русиньского языка Ярослав Сисак, у 73. сезонї (враховано тых, якы театер абсолвовав під назвов Україньскый народный театер в Пряшові) є уж 374. премєров.
Текст і фотка: драматурґ ТАД Осиф Юрчішин, контакт: 0905 328 633.
