29. 7. 2024: Над Гостовіцями припомянули собі павшых у Великій войнї

Павшых вояків із Першой світовой войны собі в суботу, 27-го юла 2024-го року, день перед 110-ов роічніцёв їй початку, припомянули над русиньскым селом Гостовіцї в окресї Снина.

Турістічный поход прямовав на місця, де проходили у 1915-ім роцї бої, при котрых вмерли тісячі вояків. Як про аґентуру TASR повів Мартін Дробняк – председа Клубу воєньской історії Бескіды, турістічный поход орґанізовали уж девятый раз при нагодї початку Великой войны.

Все послїдню юлову суботу приходять до Гостовіць турісты з близкой і шырокой околіцї, жебы абсолвовати поход по слїдах вояків. Тот рік на нїм брало участь штиридцять людей із Словакії і Польщі.

„Нултый рочник турістічного походу на верьх Скоры одбыв ся у 2015-ім роцї. Втогды і выникла думка збудовати nа боёвім полю дзвоніцю, котра буде припоминати павшых вояків. Выбудованя зреалізовало ся у 2016-ім роцї і є сполочнов ініціатівов Клубу воєньской історії Бескіды і села Гостовіцї,“ повів Дробняк. Дзвоніця, котра є сім кілометрів од села, є доступна посередництвом значеного турістічного пішника.

Завершінём шторічного путованя є пєтный акт коло дзвоніцї на верьху Скоры, котрый орґанізує ся із підпоров Озброєных сил Словацькой републікы.

Коло Гостовіць бої проходили в роках 1914 і 1915, причім найінтензiвнїшы были в апрілю 1915-го року. Жертвы кырвавых боїв доднесь припоминать дакілько памяток в околіцї, наприклад войновый цінтерь в Гостовіцях і в селї Паризівцї, або кріпта ці войновый цінтерь в селї Осадне.

Петро МЕДВІДЬ, ЛЕМ.фм, языкова і ґрафічна управа: АРК в СР.