29. 7. 2021: Треба ся спішыти, жебы не бракло місц. Інтернетова передпродаж білетів на Ватру в Михалові

Ближыт ся чергова Лемківска Ватра на Чужыні. Орґанізатор, Стоваришыня Лемків, заявлят, што чысло місц з огляду на пандемічны рестрикциі є ограничене і што білеты мож уж купувати в інтернетовій передпродажы згідні з принципом – хто першый, тот ліпшый. Доступный є тіж дрібницьовый проґрам подіі, котра пройде 7. серпня/авґуста в Михалові.

Тогорічній Ватрі на Чужыні припадат чысло 41. Минулорічну ювілейну Ватру публика, окрем запрошеных гостів, могла обзерати з огляду на пандемію коронавіруса лем онляйн. Кєд ся не поспішыте, то і того рока остане Вам така форма участи в Ватрі.

Хто першый, тот ліпшый…

Стоваришыня Лемків, орґанізатор Ватры, сердечні просит вшыткых охочых купувати білеты в інтернетовій передпродажы – чысло місц є ограничене лем до 1000 участників. Ватровиско може приняти веце, але фурт обовязуют протипандемічны ограничыня. Перше на ватряне поле впущаны будут особы з білетами купленыма через сайт Стоваришыня. Кошт нормального білету то лем 25 зл, мож схоснувати тіж знижкы.

Не лем ограничене чысло місц є доказом на тото, што подія проходит з пандемійом коронавіруса деси на фоні, але і факт, што тогорічне свято лемківской культуры на чужыні буде тырвало лем єден ден. Ціліст зачне ся в само полудне в суботу – 7. серпня/авґуста. По спортовій части зачнут ся концерты, якы переплітуваны будут інчыма акциями.

Офіцийальный початок і розпаліня 41. Лемківской Ватры на Чужыні попереджене буде зложыньом квітя під таблицями упамятняючыма акцию «Вісла». Тото наплянуване є на 15.00 год. Скорше буде конкурс верша, співанкы і рисунку для діти та выступ ансамблю Ластівчата.

Традицийне переданя Нагороды ім. Никыфора за 2021 рік за діяня для популяризациі і розвитку лемківской культуры попереджене буде коротком доповідю про історию сорока Ватр та концертом Кычеры.

 

Вечернє музикуваня

Традицийом тіж є, што суботній проґрам має перерву о 17.00 год., так штобы охочы могли помолити ся в поблизкій церкви вчас пополудньового богослужыня. Кєд іде о дальшу част проґраму, то на тогорічній листі выступуючых сут ансамблі: Розтока, Древутня, Секция, Надія і Гылля. Медже выступами, коло 20.00 год. орґанізаторы заплянували конкурс посвяченый істориі михалівскых Огниск і Ватр та спомины іх творців.

Закінчыньом Ватры буде гулянка – забава при музиці ансамблю Вороны. Танцуваня думают перервати о 5.00 год. рано 😉

Наталія МАЛЕЦКА-НОВАК, ЛЕМ.фм

(Публікуєме в оріґіналї – лемківскім варіантї русиньского языка.)