29. 6. 2019: Влада засїдала в Стропкові. Грошы дала і Токаїку ці Буківцям

Влада Словацькой републікы у віторок, 25-го юна 2019-го року, абсолвовала далше із своїх выїздовых засїдань, тотраз в Стропкові. Кабінет премєра Петра Пеллеґрініго прияв акчный план того окресу, котрый є так само меджі найменше розвитыма окресами на Словакії. Інформовали аґентуры SITA і TASR.

В найблизшых пятєх роках хоче влада в окресї вытворити 261 робочіх місць. Моментално є безробітность в тім реґіоні над десятёма процентами, причім середнє чісло безробітности в рамках цїлой Словакії є моментално на чіслі 4,88 процента. Покля бы ся подарило владї вытворити авізовану кількость робочіх місць, безробітность в окресї Стропків бы была коло 7 процентів. З цїлковой одгадованой інвестіції до року 2023, котра представлює майже 74 міліонів евр, бы мало іти нецїлых 69 міліонів в рамках сполуфінанцованя з европскых штруктуралных і інвестічных фондів. Сума реґіоналной інвестіції має быти лем 1,945 міліона евр.

 

Влада роздала скоро 1,2 міліона

Влада на своїм засїданю знова роздавала фінанції. До окресу Стропків піде на підпору реґіону 1,178 міліона евр. Підпореных было понад 70 проєктів сел, но і школ, обчаньскых здружінь, шпортовых команд і церьквей. Найвеце грошей зістане в окреснім містї, де ся інвестує до технолоґій на ледовім штадіёнї, выбудованя драгы до промыслового парку ці до закуплїня екстерных дефібрілаторів.

Полїпшыли собі і дакотры села. Буківцї дітаснуть 30 тісяч евр на закуплїня конвектоматів і умывачкы ґратів про основну і матерьску школу. Брезніця дістала із сел рекорну суму 32 тісяч на закуплїня заряджіня до сільской і школьской кухнї.

Фінанчны средства підуть і до Токаїка. Грошы были придїлены на реконштрукцію просторів Музею Токаїцькой траґедії. Вышня Олшава дістала од словацькой влады фінанчну дотацію на будованя православной церькви. Мінёвцї будуть за придїлены грошы оправлёвати стрїху на сільскім урядї.

 

Обіцяють обхват

Премєр Петер Пеллеґріні на пресконференції по засїданю влады інформовав, же влада приобіцяла і далшых 41 міліонів евр на збудованя обхвату Стропкова. Тот бы ся мав робити з грошей, котры перенесуть з невычерьпаных еврофондовых средств на проґрамы Міністерства транспорту і будованя Словацькой републікы.

Петро МЕДВІДЬ, ЛЕМ.фм, здрой фотоґрафії: Peter Pellegrini.