29. 5. 2020: Председа словацького парламенту ся оправдав Ґрекокатолицькій церькви за єй зрушіня комуністами

Председа Народной рады Словацькой републікы Борис Коллар (на фотцї першый злїва) ся офіціално оправдав Ґрекокатолицькій церькви за єй протизаконне зрушіня перед 70-ма роками.

Зробив так при нагодї 70-ой рочніцї заказу Ґрекокатолицькой церькви в бывшій Чехословакії такзваным Пряшівскым собором в рамках святочного одкрытя памятной таблы ґрекокатолицькому єпіскопови Павлови Петрови Ґойдічови на будові арешту в Леополдові, котре одбыло ся в понеділёк, 25-го мая 2020-го року. Інформовала о тім аґентура TASR.

Мало то прийти вже скорїше

„Кедь сама держава одыйде із пути почливости, справедливости, а главно людьскости, за мурами арештїв ся не знайдуть лем выконователї злочінів, але і тоты, котры собі заслужать тоты найвысшы честованя,“ повів Коллар на святочній події.

„Окремо думаме на єдного з них, котрый у тім асрештї вмер перед 60-ма роками, бо зістав вірный вшыткому, што творило ёго жывотны вартости. Вірив тому, же добро в людях є так глубоке, же наконець переможе. Зістав вірный Богу, своїй церькви, але главно свому сумлїню. Выбрав собі зато терпіня і смерть, намісто зрады самого себе. Про ґрекокатолицького єпіскопа Павла Петра Ґойдіча была найвысшым прінціпом фунґованя свята любов до ближнёго,“ продовжовав председа Народной рады.

Як далше одзвучало в приговорї Бориса Коллара, єпіскоп і Ґрекокатолицька церьков вже были регабілітованы. Но рочніця собору, котрым комуністічны власти зрушыли церьков, подля Коллара давать принагоду на выконаня ґеста, котре за ёго словами мало быти зроблене вже омного скорїше.

„Як председа Народной рады Словацькой републікы із нагоды 70-ой рочніцї зрушіня Ґрекокатолицькой церькви в бывшій Чехословакії і 60-ой рочніці мученицькой смерти єй єпіскопа Павла Петра Ґойдіча в тім арештї, выражам Ґрекокатолицькій церькви на Словакії репрезентованій їй найвысшыма представителями офіціалне оправданя за протизаконне і недемократічне поставлїня мімо закон,“ повів Коллар.

Оправданя вшыткым, котрых права были порушованы

Председа парламенту ся оправдав і вшыткым людём, котрых основны права были в тім часї значно пошкоджены державныма властями.

„Оправдам ся так само вшыткым словацькым гражданам, котрым державны власти одняли права, вкрали маєток, позбыли достойности і взяли то найцїннїше – жывот.“

Петро МЕДВІДЬ, ЛЕМ.фм, жрідло фотоґрафій: Борис Коллар.

Script logo