29. 5. 2020: Елена ХОМОВА-ГРІНЁВА: Під черешнёв, Моя єдина, Найденый лїк (Стишкы)

Елена ХОМОВА-ГРІНЁВА

 

Під черешнёв

Поцїлуй лице моє,

горячов долонёв

погладь ёго,

няй квітне красов.

Почервенїє

біле личенько,

загорить любов

в сердечках

під розквітнутов

черешнёв

в  м а ю.

 

 

Моя єдина

Тверда дражка

ногами сходжена,

то найдорогшым

золотом стелена,

зроснута

зо сердцём і душов.

ТЫ навікы

останеш моя

єдина, любезна.

ТЫ з чуджіны

заведеш мене

до родного двора.

 

 

Найденый лїк

На кажду хвороту

глядаме лїк,

змішаме добрый еліксір.

Натягнийме руку

за любовлёв, покоём,

не шмарьме зо сердця

до коша їх.

То поклад здравя

в нашім тїлї,

скрытый задармо.

 

 

Май 2020