29. 5. 2019: В Сербії проходило цїлорепублікове змаганя з русиньского языка

Як інформовала аґентура Рутенпрес, в просторах основной школы „Братство єдинство“ у войводиньскім Коцурї проходило 25-го мая 2019 вже 19-те Републікове змаганя з русиньского языка і языковой културы.

Шторік на тім змаганю беруть участь школярї основных школ, в котрых є навчалным языком русиньскый язык, або в котрых ся учіть русиньскый язык як выберовый предмет із елементами народной културы.

 

Участных 16 школярів

Як інформовала аґентура, гостїв і змагаючіх привітала директорка школы Славіця Байор і Ірина Папуґа із Дружства про русиньскый язык, літературу і културу. Участным быв і пензіонованый професор русиністікы Філозофічной факулты Новосадьской універзіты Юліян Рамач.

На цїлорепубліковім замаганю, котре находить ся і в офіціалнім Календарї Міністерства освіты, наукы і технолоґічного розвитку Сервії, брало участь 16 школярів семых і восьмых клас. Вісем їх было зо школ, де мають навчалный язык русиньскый – із Коцура, Руського Керестура і Дюрдёва, далшых вісем змагаючіх было зо школ в Новім Садї, Вербасї, Кулї, Бачскій Тополї, Ґосподніцях і Сримскій Каменіцї, де ся учіть русиньскый язык як выберовый предмет.

 

Оцїнены дістали книжкы

В рамках школярїв восьмой класы школ із навчалным языком русиньскым перше місце здобыла Наташа Тамаш із Коцура. Меджі школярями семой класы ішло перше місце до Руського Керестура, котре собі выбойовала Ребека Семан.

Із школярів восьмой класы школ, де є русиньскый язык выберовым предметом, найвеце пунктів у змаганю здобыв Михайло Пап із Нового Саду. В рамках семой класы тых школ перше місце придїлили аж штирём школярям – Іванови Сеґедіёви з Вербасу, Фіонї Грубенї і Іванови Катонови із Нового Саду і Драґанови Івановови з Ґосподніцїв.

У каждій із спомянутых катеґорій были удїлены так само другы і третї місця. Вшыткы участници, як і учітелї русиньского языка, котры пригортовили дїтей на тото змаганя, дістали подякованя од орґанізаторів. Школярї, котры здобыли єдно із першых трёх місць, дістали і книжку із выдавательского діятельства Дружства про русиньскый язык, літературу і културу.

Петро МЕДВІДЬ, Лем.фм, здрой фотоґрафії: Рутенпрес.

 

Script logo