29. 5. 2019: ІнНовиця в третім тыжни червця

Традиицийно, на зламі яри і літа в Новици на середній Лемковині проходят Театральны Стрічы ІнНовиця. Дванадцета едиция той артистичной подіі того рока пройде в третім тыжни червця/юнія. До Новиці придут театральны ґрупы так з ріжных части Польщы, як і заграниці.

Дальшый річник ІнНовиці то лем потверджыня постійного заінтересуваня театральных ґруп реченыма стрічами. Новичаньскы стрічы сут направлены головно на любителів альтернативных театральных інспіраций. На фестіваль сходят ся ґрупы, якы в своім проґрамі часто презентуют модерный підхід до розумліня театральных пєс. Вшытко дополнене єст іщы через само місце стріч. Новиця за вшыткы рокы стала ся селом знаным не лем на цілый реґіон, але сміло мож речы – на цілу Польщу.

В тым році на ІнНовици запрезентуют ся театры з Польщы, але тіж ґрупы з Німец, Білоруси, Анґлиі. Стрічы зачнут ся в четвер, 20. червця/юнія 2019 р., од проґраму в поміщынях Братства Грекокатолицкой Молодежы Сарепта. Окрем проґраму богатого в театральны представліня, ІнНовиця то тіж нагода на дальшы акциі, якы так само сут высловом модерных візий кумшту. В суботу пройде примірно вернісаж Станіслава Браха близко каплиці Успіня Пресвятой Богородиці. Не бракне ани музичных концертів ци проєкций фільмів.

На єдным з показів фільмів представеный буде образ «Ожывяме лжыцю в Новици» про традицию новичаньскых лжычкарів, о яку по днес дбают в селі – ремеслом занимают ся днешні його жытелі. В рамках фестівалю орґанізуваны сут і товаришучы акциі. Приміром можут быти лялькарскы варштаты, подіі про діти, презентация традицийного вырабляня лжыц через лжычкаря Петра Михняка і ін.

Вступне на вшыткы подіі дармо. Орґанізаторы заєдно інформуют, што ґрупы, якы того рока не встигли загнати своіх зголошынь, годны одпрезентувати ся уж о рік.

Севериян КОСОВСКЫЙ, Лем.фм

(Публікуєме в оріґіналї – лемківскім варіантї русиньского языка.)