29. 4. 2020: За добры чісла можеме самы, не попсуйме сі то

Братїслава 28. апріля 2020 (TASR)Добры чісла в штатістіцї низкого шырїня нового коронавірусу (позн. ред.: к даному дню было на Словакії 1 384 позітівно тестованых людей, 423 вылїченых паціентів а 20 мертвых) суть выслїдком вшыткых, котры одповідно приступили к епідеміолоґічным крокам і вызвам на дісціпліну. По рокованю рады епідеміолоґів то вєдно декларовали одборници з председом влады СР Іґором Матовічом (OĽANO) (позн. ред.: на фотцї).

„Позітівный вывой, котрый можеме в сучасности відїти, є выслїдком нарядженых обмеджінь, властной одповідности, але і економічных страт, котры сьме досягли,‟ повів Матовіч. „Не попсуйме сі то, зістаньне надале одповідны, дарунком за то буде можность поступно продовжовати в увольнёваню приятых рештрікцій,‟ вызвав.

Сучасный міністер здравотництва СР Марек Крайчі (OĽANO) вказав на то, же сістем рештрікцій, перевязаный з їх докладным дотримованём вытворили із Словакії приклад про остатны країны. Одборници зато апеловали на захованя сучасного тренду і одповідности. Ексміністерка здравотництва Андреа Калявска повіла, же все платьть сістема „дашто за дашто‟. „Все платять тоты істы правила, кедь їх будеме дотримовати, бенефітом буде поступно векша вольность, але кедь одповідны не будеме, можеме твердо потерпіти,‟ підкреслила.

Одборник на тропічну медіціну і председа Перманетного крізового штабу Владимір Крчмері дав акцент на то, же все єствують різіковы факторы. „Єдным є то, же дістанеме ся до самоуспокоїня і охабиме дотеперїшню дісціпліну і одповідность при ношіню рушок і соціалного одступу. Другым є режім на граніцях,‟ повів Крчмері і підкреслив то, же припадна друга волна епідемії є  скоро все „інпортована‟. „Самособов, же режім на граніцях не сміє сакціоновати тых, котры не суть різіком,‟ додав. Авізовав тым і тему кроків, што ся тыкають пендлерів, о котрій буде говорити крізоваый штаб по засїданю влады.

В одношіню з небезупечностёв другой волны припадів одборници підкреслили і різіко лїтнїх доволенок в загранічу, рекомендовали зато плановати сі доволенку на Словакії.

 

Портал Уряду влады СР, зо словацького языка перетлимачів і фотоґрафію додав: А. З.

Script logo