29. 11. 2021: На Любовняньскім замку будуть продовжовати в реконштрукціях

Зачати хотять в лїтї слїдуючого року.

На Любовняньскім замку лем пару місяцїв тому навщівникам сприступнили зреконштруованый Палац Любомірьскых і уж рихтують на обновлїня далшы части. Інформує о тім аґентура TASR.

Музею в Старій Любовнї, котрый справує Любовняньскый замок, подарило ся здобыти 850 тісяч евр на оправу северовыходной стїны, котра є в гаварійнім ставі.

Буде і археолоґічна експозіція

„Єдна часть впала іщі у 2011-ім роцї. Так само проєкт дотулять ся обновы третёго двора, єдночасно хочеме на замку вытворити першу археолоґічну експозіцію. Довгы рокы робили сьме баданя воєньскых касарень, маме одтыль барз много найдженого, і тото будеме презентовати формов діґіталных технолоґій 21-го столїтя,“ повів про аґентуру директор музея Далібор Мікулик.

Частёв проєкту є і презентація ремесел, вытворїня двора соколярїв, і про зневыгоднены ґрупы реґуларна такзвана авес терапія. Проєктову документацію вже схвалив Памятковый уряд Словацькой републікы, зреалїзовали ся і вшыткы ку тому потрібны баданя. Музей зато минувшый тыждень пожадав о ставебне поволїня. Такой, як го буде мати, выголосить публічне обстараваня на додавателя ставебных робот.

„Найпізнїше в юни 2022-го року бы сьме хотїли передати ставбу, а цїлкова реалізація проєкту, враховано такзваных мягкых актівностей, потягне ся до децембра 2024-го року.

Приготовлюють конференцію

З нагоды реалізації проєкту у віторок, 30-го новембра 2021-го року, одбуде ся онлайн конференція. Партнером Любовняньского музея є в тій справі музей у норвеґскім містї Вардо, котрый має як єдиный в Европі арктічный клімат і справує воєньску кріпость.

„На конференції, де суть запрошены і словацькый а норвеґскый посол вєдно із представителями Міністерства інвестіцій, реґіоналного розвитку і інформатізації, представить архітект Павол Пауліні проєктову документацію, а публікуєме і окремы важны пукнты проєкту,“ пояснив Мікулик.

Вшытко плане на дашто добре

По дакількорочній обнові трёх палаців о дакілько місяців знова буде на замку далша ставба. Подля директора музея бы мав по реконштрукції северовыходной стїны цїлый замок компактно заперти ся.

„Вшытко плане є на дашто добре, і кедь часть стїны впала, такой сьме зробили розсяглы археолоґічны баданя і одкрыли сьме обєкт воєньскых касарень,“ звернув Мікулик увагу з тым, же в тій експозіції будуть навщівници годны відїти, як собі жыв вояк, котрый сторожыв заємок і цїлу пригранічну область.

Музей здобыв на обнову 800 тісяч евр з ґранту Европского господарьского простору, остаток, 50 тісяч, дасть зряджователь, котрым є Пряшівскый самосправный край.

Петро МЕДВІДЬ, Лем.фм. Ґрафічна і языкова управа: ред. АРК в СР. Фото: FB/Ľubovnianske múzeum.

 

Script logo