29. 10. 2020: В Празї згорїла русиньска деревяна церьков з Великых Лучок
В пражскій Загородї Кіньскых, часть Петржін, 28-го октобра 2020-го року пополuдне выникнув пожар деревяной Церькви святого Михаіла Архістратига. Огень засягнув спідню часть храму і турню. Інформовали о тім чеськы медії.
Дым было відїти і в далшых частях главного міста Чеськой републікы. Подля публікованых фотоґрафій упала найвысша часть головной турнї. При пожарї не быв нихто зраненый. Шкода натеперь не є вырахована.
„Пожаром была спідня часть храму засягнута в повнім розсягу,“ інформовав говорця пражскых гасічів Мартін Кавка на конті Hasiči Praha на соціалній сіті Twitter. О причінї выникнутя пожару затля не суть жадны інформації. Храм згорів якраз на 102-гу рочніцю выникнутя Чехословацькой републікы, до котрой належала і теріторія Підкарпатьской Руси, одкыль храм походив.
Церьков святого Михаіла Архістратига
Церьков святого Михаіла Архістратига быв памятково хороненый обєкт із 17-го столїтя. Храм із села Великы Лучкы на Підкарпатьскій Руси перенесли до Прагы в роцї 1929, почас 1-ой Чехословацькой републікы, жебы став частёв збірок Народописного музея. Будова зо шындлёвов стрїхов мала три турнї.
Храм быв збудованый в бойківскім штілї з елементами народного барока. Найвысша вежа мала понад 17 метрів. В інтерьєрї были хосновавы тіпічны фарбы – біла, зелена і червена.
Церьков была комплетно розобрана, перенесена і пак знова поставлена до первістной подобы двараз. В роцї 1793 єй жытелї Великых Лучок продали векшому і богатшому селу – Медведївцям. Ку другому перенесіню дішло в роцї 1929, як вже было спомянуто. Святочне переданя храму жытелям Прагы одбыло ся 10-го септембра 1929-го року. На церемонії быв і ґубернатор Підкарпатьской Руси Антоній Бескид а жытелї Медведївцїв.
Зачатком 2008-го року здобыла деревяну церьков до хоснованя Православна церьков в чеськых землях і на Словакії, респектівно Румуньска православна церьков. Кажду недїлю і понедїілёк там служыли ся богослужіня.
Петро МЕДВІДЬ, лем.фм, жрідло фотоґрафій: Hasiči Praha, языкова управа: ред. АРК в СР.
