29 . 6. 2024: Новы черезгранічны проєкты ПСК за 11 міліонів евр і в русиньскых реґіонах

Веце міст і сел в Пряшівскім самосправнім краю (ПСК) буде реалізовати вдяка Проґраму Interreg Польща – Словакія 2021 – 2027 атрактівны проєкты турістічного руху, електромобілности і інштітуціалной сполупраці. Інформує о тім Оддїлїня комунікації ПСК.

Комітет моніторованя споминаного проґраму схвалив про теріторію краю цїлково єденадцять проєктовых замірів за 11,1 міліона евр. Реалізовати ся будуть в періодї років 2024 – 2027, і їх цїлкова вартость про словацько-польске приграніча представлює майже 29 міліонів евр.

Потїшуючім фактом є, же часть тых проєктів буде реалізовати ся в русиньскых реґіонах. Такым проєктом є наприклад Місце про час, на котрім бере участь Шарішскый музей в Бардеёві. Замір підпорить розвиток черезгранічной інтеґрованой турістічной оферты польского музея в Короснї, як і бардеёвского музея.

„Трифазовый проєкт принесе конкретно на словацькім боцї ревіталізацію і обновлїня ставебно-технічного ставу обєктів сканзену народной архітектуры в Бардеёвскых Купелях. Замірять ся так само на посилнїня сполупраці меджі обидвома музеями,“ пише Оддїлїня комунікації ПСК. В споминанім сканзені суть і деревяны будовы з русиньскых сел реґіону.

Місто Свідник буде партіціповати на проєктї Вєдно за здорове приграніча.  На теріторії ПСК дістав схвалїня і єден проєкт із области електромобілности, на котрый было выділеных 127 тісяч евр. Іде о проєкт Пробадайте польско-словацькы Бєщады посередництвом електромобілности, в котрім є партнером русиньске село Вышня Ядлова в окресї Свідник.

Петро МЕДВІДЬ, ЛЕМ.фм, языкова і ґрафічна управа: АРК в СР.