28. 9. 2021: Презідентка: „Реґіоналны роздїлы мають і народностный розмір.‟

Зузана Чапутова выступала зо Справов о ставі републікы другый раз.

Презідентка Словацькой републікы Зузана Чапутова у віторок, 28-го септембра 2021-го року, выступила в Народній радї Словацькой републікы зо своёв Справов о ставі републікы.

Ішло о другу шторічну оцїнку, котру прочітала в пленумі словацького парламенту од їй наступлїня на функцію презідента. З першов справов выступла в юни 2020-го року. Презідентка дотулила ся найважнїшых тем, котры моментално Словакія рїшыть. Знова припомянула і реґіоналны роздїлы.

Реґіоналны роздїли і в контекстї народностей

Презідентка оцїнила крокы влады, котры ведуть ку санації економічных допадів пандемії, єдночасно повіла, же треба признати і недостаткы. Обернула увагу і нато, же днесь уж треба думати на будучность.

„Днесь ся вже вырїшує о тім, ці докажеме створити условія про продовжованя економічного розвитку. Днесь ся вырїшує о тім, ці буде жывотна уровень приближовати ся штандарду в западных державах, або будеме стаґновати. Жадна влада не мала к діспозіції тілько средств як тота днешня. Фінанчны жрідла в подобі еврофондів і плану обновы суть достаточны на модернізацію нашой сполочности, на піднята выконности і утримательности нашого господарьства, і на забезпечіня условій про роснутя жывотной уровни,“ повіла презідентка в Народній радї.

„Жебы сьме тот цїль досягли, мусиме з повнов важностёв рїшыти тему біды і реґіоналных роздїлів, котры на южній, середній і выходній Словакії мають і народностный розмір,“ продовжовала глава державы.

„Сьме свідками величезных реґіоналных розділів і взнику соціалных нерівностей. Не можеме не смотрити жывоты розділеных родин, в котрых суть матери або отцьове примушены подорожыти за роботов до заграніча, опущаючі свої діти, бо дома собі не знають найти роботу, котра бы їх достойно ужывила.“

Чапутова в прояві спомянула в контекстї реґіоналных роздїлів южну, середню і выходну Словакію, значіть реґіоны, де має велике чісло жытелїв мадярьска, ромска і русиньска народностна меншына.

Припомянула то не першый раз

Презідентка в повязаню з реґіоналныма роздїлами спомянула і контекст народностных меншын не першый раз. Односно той темы высловила ся і в писмі, котре загнала на XV. Світовый конґрес Русинів, якый проходив у Любовняньскых Купелях у 2019-ім роцї.

„Не треба забывати ани на матеріалну і соціалну сторінку достойности чоловіка. В дослїдку реґіоналных нерівностей суть молоды Русины і Русинкы з выходословацькых окресів примушены переселяти ся за роботов до іншых реґіонів Словакії або і до заграніча. То проблема економічна, котра має неґатівны ефекты на якость жывота в тых областях. Но в припадї Русинів, і народностна проблема. Примушеный одход молодых ослаблює звязкы, через котры комуніта утримує свою културну і языкову дїдовизну,“ писала втогды презідентка делеґатам конґресу.

Петро МЕДВІДЬ, ЛЕМ.фм, ґрафічна і языкова управа: ред. АРК в СР.