28. 8. 2017: Вмерла Сілвія Зелінкова

В недїлю, 27-го авґуста 2017-го року, у віцї 41 років по довгій і тяжкій хворотї вмерла Сілвія Зелінкова, довгорічна редакторка русиньского высыланя Словацького розгласу – Радіа Патрія.

 

Народила ся Сілвія Зелінкова, роджена Противнякова, 8-го апріля 1976-го року в Меджілабірцях. Дітинство пережыла у Выдрани, котра є частьов міста Меджілабірцї. В роднім містї штудовала на ґімназії, по матурї продовжовала штудовати на Філозофічній факултї Пряшівской універзіты в Пряшові, де закінчіла персоналный манажмент в комбінації із україньскым языком.

 

В роцї 2003 наступила до Редакції народностно-етнічного высыланя Радіа Патрія, котре належыть під Словацькый розглас. Од того часу приготовила стовкы годин проґрамів різного жанру, котры ся высылали в рамках русиньского высыланя. Сілвія Зелінкова была часто і модераторков русиньскых културно-сполоченьскых подій. Як чоловік од фаху была запрошована і до порот цїлословацького конкурзу в декламації русиньской прозы, поезії, народного росповіданя, малых сценїчных форм і властной творчости під назвов Духновічів Пряшів.

 

В остатнїх роках была екстернов докторандков на Філізофічній факулті Пряшівской універзіты в Пряшові в одборї славістіка. Тему дізертачной роботы, котру не стигла докінчіти, робила у директоркы Інштітуту русиньского языка і културы Пряшівской універзіты Анны Плїшковой із русиньского языка. На русиньскім інштітутї была єден час і екстернов співпрацовнічков. Учіла шпеціфікы русиньской редакторьской роботы.

 

Погріб Сілвії Зелінковой буде у віторок, 29-го авґуста 2017-го року, од 13.00 год. у Выдрани. Вічная память!

 

П. Медвідь