28. 6. 2021: Презентація русиньскых авторів Підкарпатя
В суботу, 26-го юна 2021-го року, в ужгородьскім Центрї култур народностных меншын Закарпатя одбыла ся презентація творів писателїв области, котры пишуть в русинськім языку. Інформує о тім офіціалный сайт меншынового центра.
Орґанізатором події быв Микола Бобинець, председа Краёвого общества підкарпатьскых Русинів, єдночасно і член Світовой рады Русинів за Україну.
Онлайн на події презентовав свої творы, главно поетічну збірку під назвов „Віршы руснаків‟, котра є писана по русиньскы і по румуньскы, Володимір Рошко.
На презентації брав участь і Іван Ситар, автор многых поетічных збірок. Ситар, окрем властных творів, є знамый і перекладами стихів вызначных поетів до русиньского языка. На події зосередив увагу участных на свої тлумачіня творів Шевченка, Пушкіна, Лермонтова ці Котляревского поемы Енеїда, з якых дакотры і задеколамовав.
Так само Іван Ситар, окрем іншого Залуженый учітель Україны, представив і свою гуморістічну поетічну збірку під назвов Єврофіґлі.
Далшым презентуючім быв Александер Хуст (Купарь). Тот звертав увагу на то, же є потребна робота науковцїв, бадателїв, літераторів, жебы бадати русиньскы діалекты Підкарпатя і зробити кодіфікацію підкарпатьской варіанты русиньского языка.
О особливости менталіты, народной културы, духовности підкарпатьскых Русинів Александер Хуст розповів у своїй збірцї, котра мала недавно свою презентацію, і котра вышла під назвов „Новелы, юморескы‟.
Участны події мали можливость познакомити ся з выставков творів авторів области, котры пишуть по русиньскы. Участь брав і Олександр Лях, представитель Оддїлїня културы, народностей і реліґій Закарпатьской областной державной адміністрації.
Петро МЕДВІДЬ, ЛЕМ.фм, ґрафічна і языкова управа: ред. АРК в СР. Фото: „Центр культур національних меншин Закарпаття‟.