28. 5. 2024: Проґрам Театру Александра Духновіча в Пряшові на місяць юн 2024
5-го юна 2024
Мерькійте на Флорес (Велика сцена, 19.00 год.)
Як часто ся жена чує быти женов? Од чого залежыть чувство щастной і чарівной левітації? Твор Ніла Саймона занимать ся тыма в сучасности найважнїшыма вопросами. Тадь выважене взаємне дїяня сил їн і ян у козмосї є резултатом складной роботы над собов, над своёв особностёв, над своїм жывотом. І намагати мають ся так жены, як і хлопи, бо танґо танцюють у парї. Головна геройка знайде ся осамочена із своїм середнїм „неліквідным“ віком, і своїма свіжыма болестныма розходами. Здає ся, же жывот ся заставив, і вшыткы выроблены схемы комфортного існованя згорїли в поломінях обставин. Могла бы ся зломити і зненавидїти свою долю. Лемже… судьба дарує женї три шалены приятелькы, і двох горячіх іспаньскых любителїв жывота. Як скінчіть тота iнтересна комедія, і ці научіть ся Флорес чути ся щастливым і чарівным квіточком, дізнаме ся по посмотрїню пєсы. Тото представлїня є скапчанём прекрасного гумору, невычерьпной мудрости бытя а любви до жывота і до себе.
6-го юна 2024
Любов до ближнёго (Велика сцена, 19.00 год.)
Театер Александра Духновіча представлює інсценацію од єдного із найзнамішых російскых драматіків 20-го столїтя Леоніда Николаєвіча Андреєва. Тота комедія вказує на абсурдность нашого світа і нонсенс жывота, де трафунковы поставы чекають на смерть нещастливця коло вычапу і страчають чутя і любов до ближнёго.
12-го юна 2024
Чеканя на Ґодота (Велика сцена, 19.00 год.)
Тота абсурдна траґікомедія принесла свому авторови, довтогды мало познатому ірландьскому писателёви Самуелови Бекеттови світову славу, котра завершыла ся удїлїнём Нобеловой премії за літературу у 1969-ім роцї. О Бекеттови говорить ся, же хоць публіціту не любив, лем о Хрістови, Наполеонови і Ваґнерови написало ся веце як о нїм. Автор і пєса стали понятями, котры знають і тоты, што літературов ці театром ниґда не занимали ся. Чекати на Ґодота – то понятя зрозуміле майже каждому, і значіть безцїльне і абсурдне чеканя на когось ці штось, што наконець ниґда не прийде. І то накурто цїла дїя пєсы. Самособов, покля не спомянеме унікатне скапчаня ґротесковой клавновской гравости з глубокым філозофічным роздумом о абсурдности нашого світа. Якраз вдяка тому є Чеканя на Ґодота майже все акторьскым концертом зрїлых выпробованых акторів із молодым сердцём.
13-го юна 2024
Фараоны (Велика сцена, 19.00 год.)
Фунґованя колхозу, в котрім панують класічны стереотіпы о дїлїню роботы на хлопску і женьску, нарушыть єдного рана справа о вычеряню позіцій. Там, де стояли хлопи, будуть жены і наопак. Што ся стане, кедь хлопи-функціонарї, нараз будуть женами, котры ся старають о обыстя? Комедія Фараоны приносить гуморну і выдарену моделову сітуацію на тему перевернутя сполоченьскых роль.
19-го юна 2024
Червена калина (Велика сцена, 19.00 год.)
Темы любви і войны капчають ся в творах Василія Шукшіна в ґротесковім образі нашой добы, де головный герой Єґор глядать новый жывот як рецідівіста пропущеный з арешту. В тій драматізації його траґікомічных оповідань і новел крыє ся правда о індівідуалности вояка, котрый по войні залучать ся до сельской соціеты. Червена калина – то сімбол гріху, од котрого Єґор буде пробовати очістити ся, і знова найти свою достойность.
20-го юна 2024
Тяпаковцї (Велика сцена, 19.00 год.)
Дїя славной драматізації прозаічной предлогы вызначной словацькой
писателькы з епохы крітічного реалізму Божены Сланчіковой-Тімравы вас перенесе до минулости, на село, до дому великой родины Тяпаковців, котра є прославлена тым, же є лїнива і не має дяку будьшто робити. Інсценація жыво, з легкостёв, забавно але з ідейнов глубков підкреслює потребу ослободити ся од наносів минулости на благо будучности, котра ся основать на старых пілірах, но не сміє їх зохабити цалком спустнути. Жывот ся мусить жыти!
26-го юна 2024
Детектор лжи (Велика сцена, 19.00 год.)
Повісте собі, же о манжелстві знате вшытко? Досправды то так є? Або… може о манжелстві не знаме абсолутно ніч? І манжелство може быти єдна велика незнама… А притім прекрасна комедія! Находиме ся в обывачцї єдного класічного панелакового квартелю. Панї Надежда не знать найти одповідь на вопрос: Де мій муж Борис скрыв выплату? І так собі на поміч закличе домів гіпнотізера. Має пояснити дїла, котры суть на першый погляд баналны. А пізнїше і фаталны. Бо уж по хвілї знайде ся меджі небом і землёв. Лїпше повіджено – посеред таємніць тридцятьрочного манжелского одношіня. Тадь хто бы ся сперав покушіню спознати істинну правду і скрыты світы свого цїложывотного партнера? Нихто. І втогды ся іщі лем почнуть дїла! Минулость шокує нашых героїв, метать їх до неочекованых сітуацій. Но публіка ся барз файнї бавить! Та ці то в жывотї аж така перемога? Дізнати ся о нашых близкых досправды вшытко? Тверду правду? Як скінчіть тота сеанса несподїванок? Подарить ся загасити тот ґротесковый пожар манжелскых боїв? Буде годен в многім простодушный гіпнотізер втечі із пазурів манжелского абсурду? Так лож, як і туга розкрыти правду, єдно і друге може быти про нас солодков наркотіков, котра ся за секунду змінить на смертну отрову. Успішній комедії зо сучасности домінують брілантны акторьскы выконаня протаґоністів русиньского театру. Суть поставлены на текстовій і сітуачній перемінливости. На бавлїню ся. На дінаміцї акторьской кооперації, іскривости словных несподїванок. Значіть! Театралный вечур повный доброй забавы, усміху, котрый вам з часу на час замерзне на ротї, сміху і радостного обчутя ся може зачати!
27-го юна 2024
Ромул Великый (Велика сцена, 19.00 год.)
Ромул є послїднїм цісарём Римской імперії. Но уж рокы не владне і не выходить із своёй вілы в Кампанії. Знає, же є послїднїм цісарём. Із ним вшытко заникне, бо за граніцї імперії вторгли варвары і ідуть на Рим. Приходить змерьк цівілізації і світа, котрый дотеперь быв. Зістало дакілько послїдніх днїв. Оточіня Ромула з тым фактом боює по свому, хтось має намагу уратовати ся, хтось їмать паніку, лем цісарь робить ся, як кебы нич не дїяло ся, і інтересує ся передовшыткым о свій хов курок. Фрідріх Дірренматт збудовав у своїй пєсы вынятково добрый ґротесковый образ розпадаючой ся сполочности, їй послїднїх моментів, котры єй абсолутно демаскують і розкрывають їй досправдову суть, єднако як і тото, на што лем бавиме ся, і хто досправды перед лицём огрожіня сьме. Ромул Великый є ґротескова пєса. Барз забавна і гуморна, єднако як і твердо морозяча. Но їй гумор є очіщуючій і катарзійный, бо выходить із глубины нашой властной траґедії.
Выступлїня ТАД мімо Пряшів
1-го юна 2024
Головный тарабанщік (Културный дім Полата, 18.00 год.)
Пєсу Головный тарабанщік Александер Духновіч написав у 1852-ім роцї, но темы, котры в нїй одкрывать, суть веце як актуалны. Тадь припады здобыти функцію ці тітул не найчестнїшыма способами видиме і днесь. Любов двох молодых людей все належыть до тых найчістїшых чувств. Почливость до родічів є моралным імператівом. А рівноправность каждого чоловіка, каждого народа, доднесь не є вырїшеным, закінченым дїлом.
15-го юна 2024
Головный тарабанщік (Културный дім Рокытів коло Гуменного, 16.00 год.)
16-го юна 2024
Головный тарабанщік (Културный дім Рогожник, 15.00 год.)
22-го юна 2024
Головный тарабанщік (Културный дім Піскорівцї, 18.00 год.)
23-го юна 2024
Головный тарабанщік (Културный дім Сулин, 14.00 год.)
29-го юна 2024
Головный тарабанщік (Културный дім Руськый Потік, 18.00 год.)
30-го юна 2024
На ревізію (Културный дім Орябина, 14.00 год.)
Остра сатірічна комедія о жывотї і роботї сільского старосты і о тім, як рїшыв проблемы сільскых людей. В пєсї найдете достаток гумору і музикы, як і выпитой водкы і глубокого значіня. Пєса є приступна молодежи од 16 років.
Петро МЕДВІДЬ, ЛЕМ.фм, языкова і ґрафічна управа: АРК в СР.
