28. 12. 2020: Олена Папуґа стала державным секретарём резорту про людьскы і меншыновы права

24-го децембра 2020-го року на засїданю сербского владного кабінету было прияте рїшіня о призначіню Олены Папуґы за державного секретаря Міністерства про людьскы права, права меншын і соціалный діалоґ.

Папуґа є довголїтня русиньска політічка, членка Націоналного совіту Русинів у Сербії. До 2020-го року была і депутатков парламенту в Белеградї. Вызначну політічну функцію їй теперь сербска влада схвалила і напарек тому, же їй партія не дістала ся по вольбах в тім роцї до парламетну.

Олена Папуґа (р. 1964, Вербас) закінчіла у 1989-ім роцї Катедру русиньского языка і літературы на Філозофічній факулті Новосадьской універзіты, де здобыла тітул професора русиньского языка і літературы і професора сербо-хорватьского языка (в добовій термінолоґії, позн. ред.).

До 2008-го року робила лекторку і пак новинарьку в редакції русиньской ґазеты Руске слово в Новім Садї. Учіла русиньску лексіколоґію і етнолоґію, написала книжку Стара русиньска хыжа, котра была выдана в русиньскім, сербскім і хорватьскім языку.

Од 2008-го року до року 2020 была депутатков Народной скупштины Републікы Сербія – сербского парламенту, за Ліґу соціалдемократів Войводины. Їй партія в роцї 2020 не кандідовала окремо до парламенту, але в коаліції з далшыма войводиньскыма політічнама субєктами під назвов Войводиньскый фронт. Коаліція до скупштины не перешла. Папуґа зістала за соціалдемократів выбрата в тых самых выборах на локалній уровни за депутатку Скупштины автономной покраїны Войводина, што є парламент (крайскый) автономной области.

У 2009-ім роцї основала обчаньске здружіня Русиньска ліґа (оріґ. Руска лиґа), з котрым ся в тім самім роцї першыраз дістала до Націоналного совіту Русинів, орґану меншыновой самосправы Русинів у Сербії. Членков совіту є дотеперь. Остатнї меншыновы выборы проходли у 2018-ім роцї. Русиньска ліґа ішла втогды до выборів із списком під назвов Быти і зістати Русином (оріґ. Буц и остац Руснак). В совіті є предсидательков Выбору про урядне хоснованя языка і писма.

Почас свого діяня в сербскім парламентї была цїлый час членков Выбору про людьскы права, меншыновы права і родову рівность, Выбору про освіту, науку, технолоґічный розвой і інформачну сполочность, в котрім занимала ся школством народностных меншын. В двох выборчіх періодах была предсидательков Робочой ґрупы про народностны меншыны.

У 2018-ім роцї была в Сербії прията зміна і доповнїня закона о уряднім хоснованю языка і писма, в котрім ся становило, же посланець парламенту, котрый приналежыть к народностній меншынї, може бісїдовати і писати урядны документы в своїм материньскім языку. Олена Папуґа тото право хосновала на засїданях скупштины, кедь выступала по русиньскы з тлумачом.

Петро МЕДВІДЬ, ЛЕМ.фм, языкова управа: ред. АРК в СР.