28. 10. 2020: Любовняньскый музей робить на проєктах про гендікепованых

Любовняньскый музей в Старій Любовнї робить на двох проєктах про гендікепованы ґрупы жытелїв. Як повіла про аґентуру TASR музейна педаґоґічка Олітілія Барликова, першым є сприступнїня сканзену і єдной деревяной хыжы на практічны освітнї актівности особам з автізмом.

Другый проєкт приближыть жывот на градї почас столїть посередництвом ілустрованых приповідок про слїпых, слабозракых і глухых. На тоты проєкты музей здобыв грошы в сумі 11 тісяч евр через ґрантову сістему Міністерства културы Словацькой републікы. Докінчены мають быти до кінця 2020-го року.

Напланованы навщівы і творчі варштаты

Як повіла Барликова про аґентуру, особы з автізмом потребують мати допереду приготовленый план навщівы, котра їх чекать. Зато треба выфотоґрафовати оточіня любовняньского сканзену. Знимкы, котры будуть зображовати візуалну путь про навщівника з автізмом, будуть в правилнім упорядкованю доступны на вебсайтї музея. Вдяка тому собі навщіву будуть годны наплановати і іншы школы ці заряджіня.

Особам з автізмом за словами Барликовой приготовлять і творчі варштаты, де собі будуть годны споробовати традічны ремесла. На тоты актівности буде сприступнена і деревяна хыжа в сканзенї.

Ілустрована приповідка про слїпых і глухых

Другый проєкт представлює сприступнїня граду Любовня про особы, котры мають постиженый зрах або слух.

„Частёв цїлого проєкту є і управа пописів у експозіціях граду методов ясного друку, жебы были легко чітательны нелем про слабозракых, але і про вшыткых навщівників. Експозіції будуть так само доповнены о гаптічны (дотыковы, позн. ред.) моделы збірковых предметів выставленых на градї і доповнены пописами в Браілловім писмі,“ пояснив директор музея Далібор Мікулик.

Музей в рамках того проєкту приготовлює ілустровану приповідку про слїпых і глухых. Тота має приближыти жывот вояків, пивоварників, кухарів, слугів і далшых людей, котры жыли на градї. „Про слїпых буде приповідка коментована говореным словом, про глухых сьме приступили ку хоснованю тітулків,“ доповнив директор.

Музей в Старій Любовнї продовжує в успішных проєктах дебарьєрізації граду і сканзену. Вже од 2011-го року сприступнює град і сканзен гендікепованым ґрупам жытелїв. За дотеперїшнє діятельство быв двараз нагородженый головнов преміёов цїлонародного конкурзу Словакія без барьєр.

Петро МЕДВІДЬ, лем.фм, жрідло фотоґрафії: Ľubovnianske múzeum, языкова управа: ред. АК в СР.