28. 10. 2020: 55. народенины Тома Трієра з Данії, котрый ся інтересує Русинами

Том Трієр (Tom Trier) нар. 29. 10. 1965 в Копенгаґенї-Фредеріксберґу в Данії, даньскый антрополоґ і робітник міджінародных гуманітарных служеб.

Кедь штудовав антрополоґію на Копенгаґеньскій універзітї, на кінцї 1980-ых років Т. Тріер заітересовав ся Лемками, а наслїдно – основным русиньскым народным возроджінём по 1989 р. Потім у контекстї своёй роботы в Европскім центрї о вопросах меншын у Фленсбурґу (Нїмецько) у 1997 і 1998 роках зорґанізовав навщівы русиньскых діятелїв (позн. ред.: із Словакії в єдній із них были і В. Турок, М. Сисак, А. Плїшкова, о. Ф. Крайняк і А. Зозуляк) про спознаня  діятельства демократічных інштітуцій в Данії і Нїмецьку, а тыж про участь на тыжднёвім фестивалї русиньской културы в Копенгаґенї (позн. ред.: в рамках якой была выставка робіт русиньскых вытварників із Словакії). Т. Тієр шыроко популарізовав факт єствованя Русинів як окремого народу меджі інштітуціями Европской унії, орґанізовав стрїчі меджі русиньскыма актівістами і одповідныма урядниками з Україны (1998). Протоколы із тых стрїч у двох томах были зоставлены Т. Тріером: „Focus on the Rusyns – Заміряне на Русинів‟ (1999) (позн. ред.: (якый быв выданый редакціёв на челї з А. Зозуляком на Словакії) і „Inter-Etnic Relations in Transcarpatian Ukraine“ (1999). Т. Тріер тыж ся інтересовав о вплив културной особности америцького умелця Енді Варгола на народностне возроджіня Русинів по 1989 роцї. Тій темі присвятив документарный філм „The Warhol Nation‟ (1997).

Павел Роберт МАҐОЧІЙ, здрой: „Енциклопедія історії та культури карпатських русинів‟ зоставителїв П. Р. Маґочія і І. Попа. Ужгород: „Видавництво В. Падяка‟, 2010, с. 747, переклад з україньского языка: А. З.