28. 1. 2016: Новым заступником у выборї за Русинів є Владимір Мінчіч

28-го януара 2016-го р. у просторах Уряду влады Словацькой републікы проходили вольбы заступника членів Выбору Рады влады СР про людьскы права, народностны меншыны і родову рівность за русиньску народностну меншыну. Кандідата могли пропоновати орґанізації, котры доказательно анґажують ся в підпорї всокочіня і розвитку індентічности і културы русиньской народностной меншыны. Інформує о тім сайт повіреной задачами уповномоченого влады Словацькой републікы про народностны меншыны і етнічны ґрупы.

Як заступник членів Выбору про народностны меншыны за русиньску народностну меншыну быв зволеный ЮДр. Владимір Мінчіч, Пгд. 29-річный Владимір Мінчіч є русиньскый правник, котрый походить із Стащіна, в окресї Снина. Жыє в Братіславі і чітать лекції на універзітї. Так само брав участь на дакілько ліґіслатвівбых процесах на Словакії. Є членом Округлого стола Русинів Словеньска.

Доповнюючі вольбы заступника проходили на основі того, же єден із членів Выбору про народностны меншыны і етнічны ґрупы Мілан Мнягончак зо здравотных причін абдіковав із функції члена в новембрі 2015-го року.

В смыслї штатуту Выбору Рады влады СР про людьскы права, народностны меншыны і родову рівность і на основі взаємного договору заступників Петра Медвідя і Мілана Піліпа, на увольнене місце рядного члена Выбору про народностны меншыны наступив Мілан Піліп, котрому повірена уповномочена влады про народностны меншыны Марія Єдлічкова дня 17-го децембра 2015 р. святочно передала декрет о менованю. Піліп заступать русиньску народностну меншыну вєдно із далшым рядным членом Яном Ліпіньскым. Мінчіч буде заступником до кінця рядного функчного періоду выбору вєдно із Медвідём.

П. М.

Script logo