27. 9. 2020: Зеленьскый посмертно нагородив владыку Шашіка. Нагороду дістав і православный метрополіта Феодор

Почас робочой дорогы на Закарпатьскій области Україны презідент републікы Володимір Зеленьскый вручів державны оцїнїня, котры удїлив єпіскопови Мукачовской ґрекокатолицькой єпархії Міланови Шашікови, і метрополітови мукачовскому і ужгородьскому Україньской православной церькви Феодорови.

Інформовав о тім офіціалный сайт презідента Україны. Державны оцїнїня передав Зеленьскый в пятніцю, 25-го септембра 2020-го року, в Ужгородї.

Орден про владыку Шашіка

Голова україньской державы в пятніцю навщівив Хрестовоздвиженьскый ґрекокатолицькый катедралный собор в Ужгородї. Там Володимір Зеленьскый передав орден За заслугы ІІ. ступня, котрым быв оцїнменый владыка Мілан Шашік. Орден з рук презідента перевязв апостольскый адміністратор Мукачівской ґрекокатолицькой єпархії владыка Ніл Лущак.

Презідент державне оцїнїня удїлив владыкови Міланови посмертно 20-го юла 2020-го року за многолїтню плодну церьковну, благодійну і мілосердницьке діяльство. Владыка Мілан посвятив 160 храмів і каплиць, рукоположыв 154 новых єпархіалных священиків.

„Вдяка владыкови Міланови Шашікови Мукачівска ґрекокатолицька єпархія утвердила ся як єдна із найвпливнїшых церьковных штруктур в области, має друге місце подля кількости реліґійных орґанізацій і вірників,“ цітовав сайт презідента Зеленьского, котрый тоты слова выповів почас бісіды з єпіскопом Нілом і настоятельом катедралного собору Іваном Тидіром.

Нагородженый і метрополіта Феодор

Презідент Володимір Зеленьскый так само навщівив і Свято-Николаївску церьков в Ужгородї, де передав орден За заслугы ІІ. ступня метрополітови мукачовскому і ужгородьскому Україньской православной церькви – владыкови Феодорови (Мамусаєвови). Орден быв удїленый на основі наряджіня презідента із 21-го авґуста 2020-го року.

Метрополіта Феодор поміг розшырїню штруктуры єпархії і укріплїню кадрового потенціалу. Теперь має єпархія 358 реліґійных громад, 304 священиків, 15 монастырів і штири реліґійны братства. В Ужгородї діє Духовна академія св. Кіріла і Мефодія. Єпархія помагать матеріално і духовно сиротинцям, школам-інтернатам і шпыталям.

Як повів оцїнменый орденом владыка Феодор, є про нёго досправды честь дістати таке овїнїня з рук презідента.

Петро МЕДВІДЬ, лем.фм, жрідло фотоґрафій: Офіціалный сайт презідента Україны, языкова управа: ред. АРК в СР.