27. 8. 2021: В Габурї проходить скулпторскый сімпозій

Сімпозій в Габурї є присвяченый найвызначнїшій русиньскій скулпторцї.

Од 25-го авґуста до 4-го септембра 2021 проходить в Габурї 3-ій рочник Скулпторского сімпозія Олены Мандіч-Шіналі (Єй подоба-буста є на фотцї влїво, позн. редакції АРК в СР). Главным орґанізатором є Фундація Деревяна церьковця Габура.

На тогорочный сімпозій позваня творити приняло дванадцять скулпторів, з того двоми з Чеськой републікы.

„На тогорочнім скулпторскім сімпозію будеме дорабляти минулорічных старославяньскых богів і тему світа воды. Прибыли нам приповідковы фіґуркы Дїдка Вечернічка, котры реалізуєме у сполупраці з RTVS (державне публічне телерадіо, позн. редакції), про проєкт у Новоселіцї,“ інформує орґанізатор.

Сімпозій є одркытый і про навщівників, на котрых в окремых днях чекать културный проґрам.

Олена Мандіч–Шіналі

Олена Мандіч, з дому Шіналі (рр. 1902 – 1975), народила ся в Джюлешті, днесь теріторія Румунії. В меджівойновім періодї належала меджі найвызнамнїшых скулпторів у Чехословакії, доднесь є найвызнамнїшов русиньсков скулпторков.

Робила і памятник Томаша Ґаріка Масарика, чехословацького презідента, котрый їй сам пришов робити модел до ательєру. Вытворила і скулптуры ці бусты русиньскых будителїв. Памятник Александра Духновіча в Пряшові так само вышов спід єй рук.

Вєдно із зачатьом ІІ. світовой войны закінчіло ся творче дїятелиство Олены Мандіч. Войновы рокы пережыла з родинов у Мукачові, пак в Будапешті. Довгорічный ревматізм їй знеможнив далше робити на скулптурах і остатнїх 30 років пережыла в Кошыцях, де робила уряднічку і продавачку.

Петро МЕДВІДЬ, ЛЕМ.фм, ґрафічна і языкова управа: ред. АРК в СР.