27. 6. 2024: Елена ХОМОВА-ГРІНЁВА: Як не любити, Скрыю любов, Перла щастя, Довіра, Так..., Почекай (Стихы)

Елена Хомова-Грінёва

Як не любити...

Як не любити,

як не любити

біленьке тїло,

як снїжок,

тїшыти ся

ёго красї,

стрїчати го денно.

То створене

з ребра Адама,

то дружка

на цїле жытя,

то охрана,

то розвага,

то жертва,

то мати дїтей.

Скрыю любов
Земля дыхать

новым жывотом,
помалёванов красов

зеленой травы.

В своїм сердцю

найджену любов скрыю,

виджу твої очі

як угликы,

як капкы росы

святояньскых мушок

світячі лїтнї лампашы.

 

Перла щастя

Любов як роса

прейдеш по нїй боса,

то перла щастя,

котру видиме,

не потрымлеме в руцї,

розлывать ся

під ногами,

высхне на траві,

скоро одыйде,

позначіть сердечко,

душу, блаженостёв

роками.

 

Довіра

Чутя свої на

папірь дам,

вічну поезію

в них оспівам.

Роками іти з тобов

вєдно зась і зась.

Снажу ся

як Аврагам,

в ничім не скламати

своє довіря,

свою тугу

до твоїх рук дати...

 

Так...

Так близко чую

пах твого тїла,

здалека виджу

белаве небо,

азуровы моря,

так скоро

вітор принесе мі

пісок з теплого

югу.

Вычекую!

Помалы

приходить

писмо од тебе,

моя найдорожша,

моя любезна.

Дякую тобі

за моє щастя...

 

Почекай

Почекай на мене

під липов в гаю.

Там нашы сны

як ниткы

на шпульку

на коловратї

довєдна

сплетуть ся.

Вольность одлетїла

краём.

Орлы звысока

нам крылами

махають.

Почекай!

Не одходь!

Очекована

молодость –

любови час,

звязана машля

во волосях

дївчат.

 

(З приправлёваной кныжкы авторкы – Любов сердця.)