27. 5. 2024: В Дебрецинї на русиньскім святї передали Премію Годинкы. Лавреатом став отець Михаіл Тіводор

В суботу, 25-го мая 2024-го року, в мадярьскім Дебрецинї одбылa ся подія під назвов Русинськоє Націоналне Сято. Тото свято каждый рік орґанізує на іншім місцї Вседержавне русиньске самосправованя як головный орґанізатор, і є повязане з передавaнём Премії імени Антонія Годинкы в подобі медайлы і діплому.

Подію своїм приговором одкрыв Віктор Крамаренко, председа Вседержавного русиньского самосправованя, котрый привітав честованых гостів, меджі котрыма были наприклад Ласло Повшан, председа Културной комісії Парламенту Мадярьска ці Віра Ґіріц, посланкыня мадярьского парламенту за Русинів, Микола Бобинець, член Світовой рады Русинів за Україну, за Словакію Петро Медвідь, і далшы.

По нїм участным, котры пришли на тото свято з веце русиньскых містных, містьскых або областных самосправовань, приговорив ся і посланець Ласло Повшан. По святочных приговорах і музичных выступлінях, перешло ся ку торжественному передаваню Премії імени Антонія Годинкы.

Тот рік лавреатом премії став ґрекокатолицькый священик, отець Михаіл Тіводор, котрый походить із Мукачовской єпархії, но од 2016-го року служыть Русинам в главнім містї Мадярьска, Будапештї.

Офіціална святочна часть проґраму русиньского свята закінчіла ся молитвов Параклісу, котрый одправляв Высокопреосвященый владыка Філіп Кочіш, архієпіскоп і митрополіта гайдудороґскый, голова Мадярьской ґрекокатолицькой церькви. Тот приговорив ся участным і куртов проповідёв.

Покровителями тогорічного русиньского свята были Мікловш Шолтес – державный секретарь із вопросів реліґійных і націоналных капчань, Ласло Повшан – председа Културной комісії Парламенту Мадярьска, і Віра Ґіріц – посланкыня мадярьского парламенту за Русинів.

Михаіл Тіводор

Народив ся отець Михаiл Тіводор в Севлюші (Виноградово), на Підкарпатю, 18-го марца 1976-го року у русиньско-мадярьскій родинї. Є абсолвентом Ґрекокатолицькой духовной академії блаженого Теодора Ромжы в Ужгородї.

На священика Мукачовской єпархії быв рукоположеный владыком Міланом Шашіком в Мукачові у 2005-і роцї.

Свою душпастырьску роботу почав у русиньскых селах на Верьховинї. Дале служыв про русиньску і мадярьску громаду у своїм роднім містї. Позад того му было поручено возглавити мадярьску громаду, котра фунґовала у соборї Мукачова, і обслугововати іщі дві села. Далше служыв у селї Чорный Ардов (Чорнотисів).

У 2016-ім роцї быв посланый до Будапешта, жебы служыв русиньскій громадї і выконовав там свою душпастырьску опіку. Отець Михаіл служыть русиньскій громадї літурґії кажду недїлю і на церьковны праздникы, хрестить, приготовлять на першу сповідь і причастять, вінчать, сохранять в Будапештї меджі Русинами нашы церьковны традіції і церьковнославяньскый язык.

Отець Михаіл є ключовым участником подій русиньскых самосправовань, вседержавного, столичного і раёных, русиньскых інштітуцій при Вседержавнім русиньскім самосправованю. Так само реґуларно бере участь на празднованю Днїв Раковція у Шарошпотоцї, на Русиньскім одпустї у Шайовпалфолі, Дню памяти Антонія Годинкы, і далшых.

Петро МЕДВІДЬ, ЛЕМ.фм, языкова і ґрафічна управа: АРК в СР.

Фотоґрафії: Віктор Ґіріц.