27. 4. 2021: Никыфор і Двурнік на спільній выставі

Никыфор был для него найважнійшым мастером. Бесідуют, же єдиным. То як раз творчістю Епіфания Дровняка інспірувал ся Едвард Двурнік. Днес тых двох артистів можна стрітити на єдній выставі авкцийного дому DESA Unicum в Варшаві.

Першый з выміненых осягнул мастерство в обшыри непрофесийной штукы. Другій свідомо інспірувал ся краєвидовыма і архітектонныма ляндшафтами компонуваныма креницкым артистом і стал ся єдным з найважнійшых розпознавальных творців сучасной штукы. Выстава зачала ся 23. квітня/апріля, попереджат авкцию, котра пройде 29. квітня/апріля.

Присісти на лавці і малювати

Никыфор з Двурніком мали нагоду ся стрітити. Двурнік споминал, што разом з Никыфором приіхал його опікун. Никыфор сіл при них на лавці і залач рисувати. Він рисувал, а Двурнік смотріл. Познаня краєвидовых і аркітектонных композиций творці, його біоґрафіі спричынило, што Двурнік сам втягнул ся в таку іконоґрафію та лянсувал жытя вандруючого артисты, якій терпит біду, якого не розуміют, одмітуют.

Сам практикувал чысленны подорожы по Польщы, присідал на уличках малых місточок і рисувал, малювал, не дбаючы о маєток, доціняючы бытя в даным моменті в даным місци. В своім часі Двурнік скупувал фальсифікаты Никыфора і іх перемальовувал. Од свойого мастера перенял дослівный реализм і ґротесковіст. Захоплювал ся його креативністю, і не згаджал ся окрисляти штуку Никыфора як «наівну». Уважал го за выдатного творцю нич достерегли го інчы.

Никыфор малювал головні получыня пейзажу і архітектуры. З пасийом представлял містецкы мотивы, церкви, курортны будинкы, фантастичні выкреуваны в голові образы міст і будівлі. Артиста любил подорожувати, а його улюбленым способом подорожуваня было іздити потягами. Результатом такых експедиций были малюнкы дворців і желізницьовых стаций. Подорожувал найчастійше без білету, зато нерідко таку прогульку кінчыл кондуктор, котрый высаджал Никыфора на найблизшій стациі. Мал товды Дровняк дост часу, жебы призріти ся місцевій забудові, зробити ескіз. Аж пак сідал в наступный потяг і продолжал перервану подорож.

На выставі презентуваны будут роботы Никыфора з выображыньом єдного з дворців, представліня святых, церкви ци креницкы краєвиды.

«Най жыє война!»

Двурнік часто так само ставлял подорожы в центральным пункті свойой творчости. Єдным з його найвеце знаных циклів є «Подорожы автостопом». Творены од 1966 рока, были першыма роботами інспіруваныма Никыфором. З того циклю на варшавскій выставі сут до обзераня працы вказуючы такы міста як Катовиці, Щецін ци Сопот. Образ «Най жыє война!» походит з циклю, якій характеризує ся великом експресийом. Двурнік вказал на них дрифуючы в неокрисленым просторі страшны лиця, малюваны скоро, певным рухом, в острых кольорах. Сут то головы в шоломах, войсковых шапках, вшыткы поміщены на блакітным фоні. Образы бесідуют о борбі. Мают быти заохочыньом, акцептацийом воєн, якы ведут до освободжыня малы державы.

Выставу «Никыфор/Двурнік. Діалоґ Мастерів» обзерати мож до 29. квітня/апріля, товды о 19.00 год. будут зліцитуваны в найвекшым авкцийным домі в Польщы DESA Unicum в Варшаві. Ліцитувати мож онляйн, в аплікациі, через телефон ци постійне розпоряджыня. Авкция буде трансмітувана нажыво в соспільных медиях DESA Unicum.

Наталія МАЛЕЦКА-НОВАК, ЛЕМ.фм

(Публиікуєме в оріґіналї – лемківскім варіантї русиньского языка.)