27. 4. 2021: Вышли дві новы книжкы з тым самым обсягом, але в різных языках

Музей Спіша в Спішскій Новій Всі выдав публікацію Історія Русинів на Спішу. Книжка є выслїдком роботы тіму авторів, Мартіна Фурманїка, Юрая Павліса, Марії Станёвой Міхалковой і Мірослава Штєвіка.

Публікація є роздїлена до штирёх главных капітол, пописує історію трёх періодів (до року 1848, рокы 1848 – 1918 і рокы 1918 – 2020) і самотных Русинів Спіша з етноґрафічного погляду. Одборна і шырока верейность так має можность обознамити ся нелем з вызначныма історічныма особностями і подїями в данім реґіонї, але і з інформаціями о природных подмінках в реґіонї, способі жывота, о ремеслах і домашнїй выробі, ці о тіпічных їдлах, котры ся готовили при розлічных вызначных святах. В книжцї суть описаны родинны звыкы і обычаї (при народжіню дїтины, свадьбі ці погробі) ці календарьны свята як Фашенґы, Великдень, Русаля, Ріство... Тото вшытко є доповнене богатов образовов прилогов.

Публікація так представлює комплексну характерістіку жывота міноріты Русинів на Спішу, котра є навыше доступнов і про шырокый круг чітателїв – Історія Русинів на Спішу была выдана в двох языках – в русиньскім і в словацькім.

Публікація вышла з помочов фінанцованя Фонду на підпору културы народностных меншын, а так само вдяка спонзорам – Кошіцькому самосправному краю, Музею Спіша в Спішскій Новій Всі, селам: Орябина, Великый Липник, Порач, Завадка, Словінкы і Ґерекокатолицькому архієпіскопству в Пряшові.

(ФУРМАНЇК, М. і кол. 2020. Історія Русинів на Спішу. Музей Спіша в Спішскій Новій Всі. ISBN 978-80-85173-35-2, 256 c.)

(FURMANIK, M. a kol. 2020. Dejiny Rusínov na Spiši. Múzeum Spiša v Spišskej Novej Vsi. ISBN 978-80-85173-34-5, 256 s.)

-мп-