27. 3. 2019: В пятніцю ТАД одпремєрує приповідку Медовникова хыжка
В пятніцю 29-го марца 2019-го року русиньскый Театер Александра Духновіча в Пряшові на Великій сценї опдремєрує нову приповідкову пєсу під назвов Медовникова хыжка.
На знечіщіня природы і потребу сепарації смітя має вказати нова пєса про дїти в репертоарї театру, котру режіровав Михаел Віскочаній, і котра є зроблена на основі класічной приповідкы братів Ґріммовых.
Приповідка братів Ґріммовых у властній верзії
„Были сьме на оброблїня пєсы Медовникова хыжка ословлены прямо театром,“ повіла про словацьку державну пресову аґентуру TASR Ленка Ґараёова, котра є драматурґічков новой пєсы.
„Самособов сьме з тым были согласны, бо тота приповідка є знама, добра, думам, же єй дїти реґіструють. Є то такый приповідковый evergreen. Акурат сьме роздумовали над тым, котру із різных верзій схосновати і дішли сьме до того, же найпростїше буде зробити собі нову, властну верзію, котра буде комбінаціёв дакотрых елеметів і мотівів з веце верзій оріґіналной приповідкы написаной братами Ґріммовыма,“ продвжовала Ґараёва.
До дії інсценаторы закомпоновали роль совы Сонї як природного елементу, котрый має помочі дїтём в тяжкій сітуації, коли закрочіть. Окрім того, як повіла ґраматурґічка, є сова Соня носительков барз актуалной темы сепарації смітя і знечіщованя природы.
„Думаме собі, же є про дїти барз важне то з нима рїшыти і о тім комуніковати, бо тоты еколоґічны темы абсолутно діставають ся меджі пріоріты. Значіть совічка є звірятко, котре ся скаржыть на то, же природа є знечіщена, сепарує смітя і має намагу навчіти то і дїти,“ пояснила думку пєсы драматурґічка пєсы.
Не треба підцїнёвати дїтячу публіку
Режісер пєсы Віскочаній твердить, же дїтячу публіку не треба підцїнёвати.
„Памятам собі приповідкы зо свого дїтинства. Досправды многы твроцёве з дїтей робиять як кебы дураків. Зроблять ню-ню-ню і то як кебы старчіло. Приповідкы втогды про мене, як кебы не мали далшый план, чом бы мали заінтересовати. Была то лем скорочена, розповідана історія,“ повів режісер. Єдночасно думать, жебы сьме дїти не мали вчіти бісїдовати даякым „чудным, новым, марсіяньскым языком. Они суть хытры, мысель дїтины є барз позорна на імпулзы,“ повів.
Сполупрацу режісер спринимать позітівно
Сполупрацу з Театром Александра Духновіча Віскочаній спринимать барз позітівно, іншпіратівно і забавно. Подля ёго слів є драматічный колектів русиньского театру барз талентованый. Єдночасно ся подля нёго взаємно решпектують молодшы і старшы акторы.
І у пєсї дав можность обидвом ґенераціям. Роль Янка придїлив Ладіславови Ладомирякови, котрый ся алтернує із Мартіном Оравцом, другу головну роль Марькы грають в алтернації Зденка Кваскова і Івета Фейкова. Отця собі заграть Осиф Пантликаш, котрый ся буде черяти з Любоміром Міндошом. Людмилу Лукачікову буде мож в новій приповідцї відїти як мачоху, Бабу-Яґу грає Василь Русиняк і сову Соню Ярослава Сисакова.
Премєра Медовниковой хыжкы є в пятніцю 29-го марца 2019 о 17.00 год. на Великій сцені ТАД, другу премєру мож відїти уж в недїлю 31-го марца о 16.00 год.
Петро МЕДВІДЬ, лем.фм
