27. 2. 2020: Папа Франціск выменовав нового секретаря восточной конґреґації

Папа римскый Франціск выменовав 25-го фебруара 2020-го року нового секретаря Конґреґації про выходны церькви. Став ним владыка Джорджо Деметріо Ґалларо, дотеперїшнїй єпіскоп Єпархії Піана делі Албанесі Італо-албаньской ґрекокатолицькой церькви на Сіцілії в Італії. Єдночасно му быв удїленый тітул архієпіскопа.

Новый секретарь у функції вычеряв архієпіскопа Кіріла Василя, котрый быв 20-го януара выменованый за апостольского адміністратора sede plena Кошыцькой ґрекокатолицькой єпархії. Владыка Кіріл быв на посаді секретаря од 2009-го року. Префектом конґреґації є кардінал Леонардо Сандрі.

Владыка Джорджо Деметріо Ґалларо народив ся 16-го януара 1948-го року на Сіцілії. По богословскых штудіях переселив ся до Лос Енджлс у Споєных штатах Америкы, де быв у 1972-ім роцї рукоположеный на священика.

В році 1987 быв інкардінованый до Мелхітьской ґрекокатолицькой єпархії Нютон. Учів канонічне право в Мелхітьскій єпархіалній семінарії св. Ґриґорія Богослова в місті Нютон. Пізнїше быв професором канонічного права в Семінарії св. Кіріла і Методія в Піттсбурзї, котра належыть під тамтешню русиньску архієпархію.

31-го марца 2015-го року быв выменованый за єпарху про італо-албаньскых віруючіх на Сіцілії і рукоположеный на єпіскопа быв 28-го юна 2015-го року.

Петро МЕДВІДЬ, ЛЕМ.фм, жрідло фотоґрафії: Wikipedia.