27. 10. 2019: Влада схвалила грошы про музей Варгола, Калинів і окрес Снина

23-го октобра 2019-го року проходило далше выїздове засїданя влады Словацькой републікы, тот раз в Кежмарку. Як інформовала аґентура TASR, владный кабінет знова роздїлёвав грошы.

В Кежмарку ся вырїшыло і о тім, же фінанчны средства дістануть ся і до русиньского реґіону. Влада схвалила грошы про окрес Снина, про музей Варгола в Меджілабірцях і про село Калинів на докінчіня обновы Памятника ослободжіня.

 

Окрес Снина буде рїшыти воду на питя

Хоць в окресї Снина находить ся водный резервоар Старина, котрый быв выбудованый на теріторії, де колись были русиньскы села, якраз тот окрес має проблему з водов на питя. Жебы рїшыти сітуацію, влада схвалила Пряшівскому самосправному краю пожычку єден міліон евр.

Схвалена сума має служыти на выпрацованя проєктовой документації про выбудованя енвіроменталной інфраштруктуры в окресїі.

Пряшівскый самосправный край має в окресї Снина цілково 34 сел, з того лем шість діспонує злїпшеныма службами додаваня воды на питя і каналізації. „Добудованём основной інфраштуктуры бы ся в окресї підпорив і турістічный рух“, пише ся в матеріалі влады.

Край вже в місяці май підписав змлуву на выпрацованя штудії реалізації проєкту. Тота штудія є фінанцована з дотації в сумі 130 тісяч евр і єдночасно з розрахунку краю в сумі 16 тісяч евр. Моментално ся на штудії робить. Посуджованы в нїй будуть децентралізованы рїішіня додавок воды штирёх зґруповань сел в окресї Снина зо жрідел, котры бы представлёвали алтернатіву ку резервоару Старина.

Выбудованя енвіроманталной інфраштруктуры буде плачене з еврофондів. Но край потребує достаток фінанцій на час меджі заплачінём проєктовой документації і здобытьом средств од сел з чуджіх жрідел. Зато потребує поміч од державы, котра была днесь схвалена.

 

Музей Варгола дістане понад 7 міліонів

В Кежмарку ся дефінітівно схвалили і грошы про Музей модерного уменя Енді Варгола в Меджілабірцях. 7,1 міліон евр є сума, за котру ся Варголів музей перебудує. У владнім матеріалі было підкреслено, же є то єдиный музей Варгола в Европі і єден з двох існуючіх на світі.

Схвалены фінанчны средства дадуть музею сучасный дізайн і функціоналіту, котры зодповідають 21-му столїтю. Веце о планованій реконштрукції мож дочітати ся ту.

В музею будуть новы оддыховы і інтерактівны зоны, лїтнїй амфітеатер на стрїсї будовы, але і ательєры. Перебудованя забезпачіть до будучности можливости орґанізованя різный подій, будуть годны робити ся і презентації уменя в екстерьєрї на терасї, котра буде на стрїсї, на фасадї будовы, а і на новім намістю перед будовов.

Фінанції ся будуть давати поступно. Першы два міліоны прийдуть до 31-го януара 2020-го року, до 31-го януара 2021-го року бы музей мав дістати далшы штири міліоны, зостаток – 1,1 міліона евр, бы мав прийти до 31-го януара 2022-го року.

 

Грошы і до Калинова

І першому освободженому селу в бывшій Чехословакії днесь влада схвалила грошы. На ревіталізацію публічного простору коло Памятника ослободжіня дістав Калинів, в окресї Меджілабірцї, 50 тісяч евр.

За тоты грошы має оправити ся драга ку Дому смутку, котра веде коло памятника, так само бы мало новый асфалт дістати намістя перед памятником, докінчіти бы ся мали і теренны оправы. Уж теперь реалізує ся обнова памятника і ёго околіцї, на што влада дала 60 тісяч евр іщі в місяцї апріль. За тоты грошы были зреалізованы роботы на санації і обновлїню памятника.

Петро МЕДВІДЬ, ЛЕМ.фм, здрой фотоґрафії: Mesto Kežmarok

Script logo