27. 10. 2016: Делеґація словацького міністерства міджі войводиньскыма Русинами

Як інформує пресова аґентура Рутенпрес, 26. октобра 2016 Руськый Керестур у Войводинї, в Сербії навщівила делеґація Міністерства школства, наукы, баданя і шпорту Словацькой републікы, в котрій были штатный таёмник того міністерства Русин Петро Крайняк і шеф ёго канцеларії – Русин Мірослав Осифчін. Але головным пунктом їх навщівы была стрїча з представителями Міністерства освіты, наукы і технолоґічного розвитку Серьбской републікы в Белеґрадї.

В рамках делеґації П. Крайняк як русиньскый актівіста на Словакії вырїшыв навщівити і войводиньскых Русинів. Будучі в Руськім Керестурї делеґація пришла до русиньской ґімназії Петра Кузмяка. Стрїтила їх директорка школы, з котров поклонили ся перед памятником патрона школы. Дале П. Крайняк з М. Осифчіном навщівили Руську матку – русиньску орґанізацію, члена Світового конґресу Русинів. Гостїв прияв єй председа Дюра Папуґа, з котрым вели діскузії о актуалній сітуації русиньского руху в Сербіі. Делеґація была гостём і Народной рады Русинів у Сербії.

Послїдным пунктом навщівы в Руськім Керестурї была срїча з парохом містной Ґрекокатолицькой церькви св. Миколая – о. Михалом Малацком, котрый представив гостям історію той найстаршой русиньской парохії в Сербії. Потім навщіли і Монастырь отцїв василіянів у Кулї. Далшый день делеґація Міністерства школства Словацькой републікы перебывала в Новім Садї.

Северіан КОСОВСКЫЙ