26. 9. 2024: На святкованя рочніцї Карпато-дукляньской операції піде майже міліон евр

Міністерство обороны Словацькой републікы планує на 6-го октобра 2024-го року святкованя 80-ой рочніцї Карпато-дукляньской операції, котры шторік проходять на Дуклї і в Свіднику. В рамках святковань має одпрезентовати ся воєньскый музей, котрый є у Свіднику, і авіаційна техніка Озброєных сил Словацькой републікы.

Як выходить з владного матеріалу, на святкованя піде тот рік майже міліон евр. Словацька влада тот документ схвалила в середу, 25-го септембра, інформує аґентура TASR. Точна сума, яка піде на святкованя рочніцї, є 974 тісяч евр. 22 тісяч евр із придїленых на святкованя фінанцій має дістати прямо місто Свідник.

Карпато-дукляньска операція была найвекшым і найкырвавішым боём лінії выходного фронту, котра є повязана з теріторіёв днешнёй Словакії.

Войска Червеной армії і Першого чехословацького армадного корпусу під веджінём ґенерала Людвіка Свободы почас нёй вели тверды бої з нїмецькым войском. Офензівна операція, котра мала споїти повстанецькы силы Словацького народного повстаня із совєтьскыма войсками, тырвала од 8-го септембра до 28-го октобра 1944-го року.

6-ый октобер є на Словакії День героїв Карпато-дукляньской операції, записаный в календарї як памятный день. В тот день ся Першому чехословацькому армадному корпусу подарило перекрочіти по тяжкых боя через Дукляньскый перевал чехословацькы граніцї.

Петро МЕДВІДЬ, ЛЕМ.фм, языкова і ґрафічна управа: АРК в СР.

Фото: Марош Черный/TASR.