26. 8. 2021: «Памяти нашых бурсаків» – великій ґаля концерт в Ґорлицях
9. вересня/септембра на ґорлицкым рынку одбуде ся концерт в 30. річницю реактивациі Стоваришыня Руска Бурсa.
Як важне значыня має памят в нашым жытю, найліпше вказує лемківска істория. Без памяти, продолжаня і утырваляня выпрацуваных правил і канонів быти може уж бы не было того, што днес маме.
Наша спільнотова памят єднат нас і коло памяти сут люде, якым вельо завдячаме. Памят о тых, што одродили штоси, жебы дальшы могли з того черпати.
І так свою громадску памят мают ґорлицкы бурсакы. В 2021 р. споминаме 30. річницю реакцивациі Общества Руска Бурса в Ґорлицях і 10. річницю основаня першого лемківского радия ЛЕМ.фм. Точны даты тых річниц выпали 1. червця/юнія.
Но, бурсакы уж неодолга хочут припомянути не лем тоты подіі, але предовшыткым люди, што іх ініциювали. 9. вересня/септембра на ґорлицкым рынку одбуде ся великій ґаля концерт пн. «Памяти нашых Бурсаків – в 30. річницю реактивациі Стоваришыня Руска Бурса».
Выйти до Ґорличан
Ґаля концерт зачне ся о 16.00 год. в центрі Ґорлиц – на рынку. Од самого зачатку задумом бурсаків было тото, жебы выйти до Ґорличан і вказати не лем тото, што в місті од більше як столітя діє Руска Бурса, але шырше запрезентувати на высокым рівни лемківску культуру.
Проґрам святкувань зачне ся привитаньом згромадженых через ведучу Стоваришыня Руска Бурса в Ґорлицях Наталию Малецку-Новак. Пак выступит бурсяный молодіжный ансамбль «Терочка», якій окрасит нас богатым лемківскым репертуаром.
Ансамбль был основаный в 2008 р. і од зачатку мал за задачу анґажувати і покріпляти здібну лемківску молодіж і діти в іх артистичных знанях.
Бигатство лемківского/русиньского фольклору підкрыслит і другій з запрошеных ансамблів. Буде то «PUL’S (ПУНА)» з Пряшова – єдиный во світі професийональный русиньскій колектив, якій презентує автентичный і стилізуваный фольклор такой зо вшыткых части Карпатской Руси.
«PUL’S» не треба такой представлювати, кєд же лемківску душу радує він веце як 65 років, а головно был слуханый товды, коли на його концерты ходили переселенці і іх діти з заходу Польщы, якы глядали того, што не было ім дане.
Памят на вікы
Помедже концертами буде як раз місце на спільнотову памят. Посмертно одзначеный Золотым Крестом Заслугы буде тот, якій по роках недоли вызволил Руску Бурсу з чужых рук і привернул єй жытя.
Богдан Ґамбаль был як раз тым, якій явил ся реактиватором Общесвта Руска Бурса в Ґорлицях. За його справом ґорлицка бурса одродила ся не лем на папери в 1991 р., але остаточно в 2009 р. были ій вернути маітельскы права до історичной будівли при ул. Сєнкєвіча 28.
В тот ден вынятково памятати будеме і на інчых вызначых бурсаків, опікунів – вшыткых тых, што своє жытя, часто приватне, вільный час – посвячали орґанізацийным справам, жебы не вшытко пішло на дармо, жебы ся не лем консервувало, але розвивало фурт лем допереду.
Спомнийме хоцбы на першых ведучых ґорлицкой бурсы – заєдно тых сперед выселінь, як і тых по 1991 р. Памятайме і на тых, што ґаздували при бурсі, кєд треба было плекати єй як свій рідній подворец.
Будут гості, буде гостина
Святкуваня 30. річници одроджыня єдной з найважнійшых довоєнных лемківскых орґанізаций проходити будут при участи чысленных гостів з заграниці.
Будут то делеґаты і гості XVI Світового Конґресу Русинів, якій в днях 10. – 11. вересня/септембра одбуде ся в Креници. Тогорічный конґрес орґанізує сестрина до Руской Бурсы орґанізация – Стоваришыня Лемків.
Концерт пляново одбуде ся на ґорлицкым рынку. Але, кєд хвиля буде планна, буде він перенесеный до Ґорлицкого Центру Культуры. Гостина – як все – в просторах Руской Бурсы. Весельме ся, бо єст чым.
Севериян КОСОВСКЫЙ, ЛЕМ.фм
(Публікуєме в оріґіналї – лемківскім варіантї русиньского языка.)
