26. 6. 2020: Миколай КСЕНЯК: Орїшок і русиньскый хрест, Холем на дві-три секунды, Фосілія (Байкы)

Миколай КСЕНЯК

ОРЇШОК І РУСИНЬСКЫЙ ХРЕСТ
„Найвекшый хрест на світї мають Русины‟
                          (Народны новинкы 40/1999)
На Буківскій Гірцї при Стропкови Орїшок чвірікать.
– Досправды собі, трираменный, думаш, же єсь
найвекшый на світї? І зато выпинаш свою пыху
Всевышнёму?
– Мылиш ся, Орїшку, і інформацію маш смішну:
я ту лем припоминам нашу гордость і надїї
Русинів. 

ХОЛЕМ НА ДВІ-ТРИ СЕКУНДЫ
З поштовой словеньской знамкы выступив Михал 
Стренк, пришов ку мі, подав руку.
– То вы так наполїгали і наконець сьте ня із знамкы
вылудили на тоту стрїчу?
– Я, Михале, холем на секунду, холем вам, краянови і Русинови руку стиснути,
бо цїлый світ вас цтить, хвалить як боёвника проти
фашізму, як рыцаря-борця за слободу...
– Я вас, Миколаю, тыж трохы познам: пишете     
о дротарёх, поучны байкы, підпоруєте русиньске
возроджіня... Но уж мі сіґналізують, мушу іти!        
– Де ся понагляте? Тадь вы уж ніч не змешкате...
– Мам повинности на цінтерю при презідентах...
– Дякую! Збогом, Михале,
А частїше до родного краю приходжайте,
На нас не забывайте...
– Як бы-м міг?
Ласка ку родному
Мі колує в крови.

ФОСІЛІЯ
Недавно найдена фосілія рыбы
Проштудовала свій родостром 
І написала резюме:
„Учены не мудровали,
Они признали, 
Же мы, рыбы,
Сьме мали 
За міліоны років
Вывой стабілный, без скоків:
Наш предок не пердїв,
Алкоголы не пив,
Но традіцій ся туго держыть:
І днесь
Од головы смердить.‟

(З приправлёваной книжкы Одповідж собі сам.)