26. 5. 2021: Ювілейна выстава творів Адальберта Ерделия

25. мая 2021 р. припоминаме 130. річницю народжыня Адальберта Ерделия (1891-1955), вызначного русиньского маляря, педаґоґа, культурного діяча на Підкарпатскій Руси.

Ерделий был і тым, хто основал прославлену Підкарпатску Школу Малюваня, з якой вышла міцна ґенерация русиньскых творців. З той нагоды Закарпатскій Областный Умелецкій Музей ім. Бокшая в Ужгороді зрыхтувал принагідну выставу творів артисты, яка одкрыта буде од днес.

Моноґрам душы

Выставу творчости Адальберта Ерделия буде мож видіти од днес. Вернісаж зачне ся о 16.00 год. в просторах ужгородского музею.

В запрошыню на подію підчеркує ся, што Ерделий был выдатном постатю ХХ ст. На выставі презентуваны будут ріжного рода працы, якы в своім жытю вытворил тот підкарпатскій артиста. Окрем образів і ґрафік вказаны будут каталоґы і статі про творчіст Ерделия. В сумі буде 80 ріжного рода творів.

Адальберт Ерделий

Артиста народил ся 25. мая 1891 р. на Підкарпатскій Руси. Отримал освіту в обшыри кумшту, котру схоснувал в своім дальшым, плідным періоді жытя.

В 1927 р. вєдно з інчым вызначным русиньскым малярьом Йосифом Бокшайом основали в Ужгороді Публичну Школу Малюваня. Дальше в 1931 р. Ерделий врал участ при покликаню Общества дѣятелей изобразительныхъ искусствъ на Подкарпатьской Руси, котре стало ся основом до створіня славной Підкарпатской Школы Малюваня. Многы рокы головувал тому обществу, котре выховало і выпустило до світа вельох заслуженых русиньскых артистів.

Його творы выставлювали ся в вельох столичных містах Европы. Адальберт Ерделий вмер 19. вересня/септембра 1955 р. в Ужгороді. Більше з біоґрафіі творці чытайте в статі присвяченій 125. річници народжыня.

Севериян КОСОВСКЫЙ, ЛЕМ.фм

(Публікуєме в оріґіналї – лемківскім варіантї русиньского языка.)