26. 5. 2020: До заграніча мож іти на 48 годин, кіна і театры одкрыють ся і в недїлю

Можность коротко піти до 8 країн без повинной карантены при навернутю, котра дотеперь была платна на 24 годин, ся од середы (27. мая 2020) продовжує на 48 годин. По понедїльковім засїданю конзілія одборників то увів председа влады СР Іґор Матовіч (OĽaNO) в рамках актуалізації увольнїня протиепідеміолоґічных рештрікцій. Ознамив єдночасно, же кіна і театры, але і турістічны інформачны центры будуть мочі быти одкрыты і в недїлю. 

Продовжіня короткого перебываня в загранічу без повинности карантены і неґатівного тесту на КОВІД-19 з боку словацькых урядів ся тыкать попутованя до сусїднїх країн – Австрії, Марярьска, Ческой републікы, Польщі, але тыж оддаленїшых країн – Хорватії, Словіньска, Нїмецька і Швейцарії.

„Продовжіня на 48 годин уж уможливить даяке нарочнїше рокованя в загранічу, але і навщіву членів родины у оддаленїшых дестінаціях,‟ повів премєр. Признав, же задачов словацькой екзекутівы є добісїдовати ся з країнами о взаємнім вольнім русї, значіть, жебы і в другых країны не выжадовали од обчанів Словакії неґатівный тест на КОВІД-19 і єднакы выгоды мали обчане тых країн, якы ідуть на Словакію.

Подля ёго слов СР рокує із вшыткыма восьмома країнами. „Вшыткы суть барз, барз опатерны, але є правдов, же Словакія в тым припадї, односно  епідеміолоґічной сітуації, є найжелательнїшов невістов,‟ повів. Вказав на то, же з дакотрыма країнами ся може договор зродити в ходї днїв, в дакотрых припадах буде гляданя консензу трывати довше...
Представителї конзілія одборників похвалили добру епідеміолоґічну сітуацію, за котров суть прияты рештрікції і одповідность їх дотримованя. Верейность надале вызвали вытримати. „Ужывайме сі то, што є доволене так, жебы сьме сі не прикликали нарост інфекції,‟ підкреслила епідеміолоґічка Марія Авдічова. Указала такісто на факт, же надале єствує різіко наказы зо заграніча.      

Од 27. мая 2020 стануть платным і флексібілнїшы условія про внутрїшнї заряджіня, котры собі будуть мочі выбрати, ці дотримають крітерії 15 кубічных метрів на заказника, або двойметровый одступ меджі заказниками або двойметровый одступ од окраїв столів. Єднако будуть мочі заряджіня верейного стравованя мати одкрыто і по 22.00 годьнї про закрыту сполочность. „Фірма мусить мати список гостей на такій акції, котрый буде к діспозіції гіґіенікам почас 30 днїв од конаня акції, жебы в припадї позітівного тесту могли перетестовати вшыткых тых, котры з інфікованым были в контактї на тій ославі,‟ высвітлив Матовіч.... 
Медіалный сервіс Уряду влады СР, зо словацького языка перетлумачів i скоротив: А. З.

Script logo