26. 5. 2017: Русиньскый язык на Пряшівкій універзітї

(Мобіліты штудентів і можности штудія на загранічных універзітах)

 

В рамках Русиньского фестівалу у Свіднику, котрый має уж пятьрічну традіцію, дня 24. мая 2017 (середа) одбыла ся презентачна акція о можностях штудія русиньского языка на Пряшівскій універзітї.

Одборна асістентка Інштітуту русиньского языка і културы Пряшівской універзіты (ІРЯК ПУ) ПгДр. Кветослава Копорова, ПгД., представила штудентам свідницькых середнїх школ (ґімназії, середнёй промысловой школы і здравотной школы) можности высокошкольского штудія учітельского штудійного проґраму русиньскый язык і література в комбінації предметів з акцентаціов на мобіліты штудентів. В рамках европского проєкту Еразмус плус (Erazmus+) мають штуденты на вшыткых трёх ступнях высокошкольского штудія (бакаларького, маґістерьского і докторандьского) можность єдносеместралного штудійного перебываня не европскых універзітах. Конкретно Інштітут русиньского языка і културы ПУ має підписаны договоры з універзітами в Кракові (Педаґоґічна академія), в Новім Садї (Новосадьска універзіта) і в Празї (Карлова універзіта), то значіть, же каждый штудент русиньского языка і літературы має можность штудовати єден семестер тот язык, респ. подобны дісціпліны в рамках выходных славяньскых языків на высшеуведженых універзітах. Окрем того, Інштітут русиньского языка і културы ПУ має таксамо підписаны договоры  із загранічныма русинськыма сполками і орґанізаціями, до котрых таксамо можуть штуденты в рамках лїтнїх вакацій іти на практіку і там профіловати свою далшу орьєнтацію. Добры скушености суть із орґанізаціов rusíni.cz в Празї, де перебывали дві штуденткы інштітуту. Їх задачов было вести годины русиньского языка із дїтми родічів, котры мають русиньке корїня, довгодобо жыють у Празї і хотять, жебы їх потомство спознало язык і културу своїх предків. В орґанізації Руська бурса в Ґорлицях, в інтернетовім радіу лем-фм у жывім высиланю выпробовали свої силы модераторів і редакторів таксамо двоє штудентів з Інштітуту русинського языка і културы.

 

Хоць на презентачній акції были штуденты іщі лем першого і другого рочника высшеуведженых середнїх школ, віриме, же їх холем дакотры інформації заінтересовали і в будучности будуть роздумовати і о такій можности своёй реалізації, може ай перспектівной професії.                                                

 

-кк-, фоткы Л. Шандаловой