26. 11. 23019: В Чірчу збудовали нову матерьску школу за штири місяцї

В селї Чірч в окресї Стара Любовня передали в середу, 20-го новембра 2019-го року, до хоснованя нову матерьску школу. Інформовала о тім пресова аґентура TASR.

Реконштрукціёв і приставбов ку старій, скоро 40-рочній будову, подарило ся звекшыти капаціту матерьской школы з 21 на 46 дїтей. Село є вже теперь приготовлене на новы правила, кедьже од 1-го януара 2021-го року на Словакії будуть дїти повинны ходити до матерьской школы од 5-ёх років.

Ниґда порядну не мали

„В Чірчі ниґда не была порядна матерьска школа, все то было лем в провізорнім домі. Думам, же нашы дїти, а главно родічі будуть спокійны, кедьже вже теперь сьме приготовлены на новы правила. Вытворили сьме і єдно нове робоче місце,“ цітовала аґентура старосту.

Тот рік ходить до матерьской школы в Чірчі 40 дїтей. На выбудованя дістало село фінанчну дотацію в сумі 320 тісяч евр з Уряду уповномоченого влады Словацькой републікы про ромску комуніту, кедьже в селї жыє і тота народностна меншына. Цїлковы вытрати были коло 340 тісяч. Уповномоченый про ромскы комуніты Абел Равас быв і на святочнім одкрытю школы.

Збудовали за штири місяцї

Матерьска школа є одкрыта про дїти од 21-го новембра 2019 р. Будову затеплили, чім бы ся мало шпоровати на енерґіях. В ареалї прибыли новы пішникы і плот.

Чірч нову матерьску школу стигнув за рекордно короткый час. Будовали єй лем штири місяцї. Роботы на ставбі реалізовала сельска фірма Солиско Чірч, котра давать роботу 23-ом людём зо села. Фірма такой пустила ся до далшой ставбы. В Чірчі будують комунітный центер. Тот дасть роботу далшым штирём людём зо села.

Петро МЕДВІДЬ, ЛЕМ.фм