26. 11. 2019: Припомянули собі 75-ту рочніцю Токаїцькой траґедії

В селї Токаїк в Стропківскім окресї собі в пятніцю, 22-го новембра 2019-го року, припомянули 75-ту рочніцю Токаїцькой траґедії. Споминова стрїча проходила при памятнику Навернутя до выпаленого села.

Як інформовала аґентура TASR, на пєтній події брали участь представителї штатной справы, армады, самосправ, членове Словацького союзу протифашістічных боёвників, але і жытелї Токаїка а сел околіцї.

Токаїцька траґедія

Токаїцька траґедія одбыла ся 19-го і 20-го новембра 1944-го року. Была то масакра в катастралній теріторії русиньского села Токаїк, і была одплатов нїмецькых войск за то, же містны жытелї( помагали партізанам.

19-го новембра наперед нїмецькы вояци, котрых было коло 200, обсадили село, позберали хлопів зо села ку містній церькви і одвели їх на север од Токаїка, де їх пострїляли. При тім злочінї вмерло 32 мужів, 2-ом раненым ся подарило пережыти. Слїдуючій день націсты село выпалили, жены і дїти розогнали. В Токаїку згоріло 27 хыж і 28 господарьскых будов. Стояти зістала лем церьков і єдна хыжа.

Село ослободили 28-го новембра новембра 1944-огомроку совєтьскы войска 4-го Україньского фронту. Мертвы тїла пострїляных мужів лежали на місцї, де їх пострїляли аж до 12-го децембра, коли їх жытелї сусїднёго села поховали до масового гробу. По навернутю містного населїня были їх тїла ексгумованы і 4-го апріля 1945-го року похованы на містнім цінтерї до окремых гробів.

Жытелї Токаїка жыли в скормных обставинах аж до 1946-го року, коли держава дала грошы на обновлїня села. По жертвах зістало 16 вдов і 67 сирот.

Про молодых то не інтересна тема

„В сучасности жыють вже лем трёми, котрых отцёве масакру пережыли. Марія Медвецова мала шість роков, Ян Медвец десять років і Алжбета Данчішакова єден рік. Стражданя жыти з тым далше не было просте. Про векшыну молодых людей то, нажаль, не інтересна тема на роздїл од множества несмыслїв і дезінформацій на соціалных сітях, котрым не дасть сперати ся,“ повіла в приговорї почас пєтной події старостка села Яна Медвецова.

Сама старостка має надію, же о ужасах войны будеме слухати вже лем зо жывых спомин нашых предків, в музею і почас споминковых стрїч. Выразила радость, же на споминковых стрїчах є каждым роком веце людей.

Медайла міністра обороны

Почас спомиковой події удїлили страстцї Токаїка бронзову памятну медайлу міністра обороны Словацькой републікы.

Деджавны секретарь резорту Маріан Салонь ся подяковав їй, і жытелём села за приготовлїня події. „І такым способом є барз важне припоминати тоты дії і нам, ґенераціям, котры не жыли у войнї, дїтям в школї, жебы сьме не думали, же вшытко, што теперь пережываме в мірї, є природным,“ повів Салонь.

Токаїцьку траґедію припоминать і Музей Токаїцькой траґедії. Село почас тогорічного выїздового засїданя влады в Строкові дістало дотацію 80 тісяч евр, котру хоче схосновати за словами старосткы на реконштрукцію внутрїшнїх просторів, розшырїня і модернізацію експозіції.

Петро МЕДВІДЬ, ЛЕМ.фм