26. 11. 2018: Малом лжыцьом смакує долше: языково-літературна бесіда

Інститут Західньой і Полудньовой Славістикы Варшавского Університету, Інститут Славістикы Польской Академіі Знань, Чешскій Центр і Стоваришыня Етноґрафічня Працовня просят 1. грудня/децембра 2018 р. до Варшавы на языково-літературну дебату, в якій участ возмут писменникы, тлумачы і дослідникы літератур в меншыновых языках.

Як бесідує лужыцкє прислівя «Малом лжыцьом смакує долше». Лем ци література чытана і писана в малым языку може быти «смачнійша» од той великой? На што тлумачыти світову клясику на меншыновы языкы і ци має то влияня на розвиток языка? Чого великы літературы можут ся навчыти од тых найменшых?

На тоты і вельо інчых звідань спрібуют одповісти запрошены гості, серед котрых буде і представничка Лемків, докторантка на Філолоґічным Выділі ЯУ, дослідничка лемківской літературы – Марта Ватраль. Участ в бесіді возмут і Артур Яблоньскій – писменник, автор творів в кашебскым языку, діяч стоваришыня Кашебска Єднота, Юстина Мєрска-Шнайдер – ведуча Стоваришыня Вілямовяне, ревіталізаторка і вілямівска активістка, Пьотр Шатковскій, мазурскій активіста, тлумач, редактор, та Ґжеґож Кулік – шлезскій языковий діяч, публициста і тлумач. Дебату буде вюл др Артур Чесак – діалектолоґ, лексикоґраф, любитель і дослідник літературных мікроязыків.

Дебата єст акцийом, яка завершат медженародну конференцию молодых дослідників «Малий язык, велика тема», што проходит в днях од 30. листопада/новембра до 1. грудня/децембра 2018 р.

Публікуєме в оріґіналї - лемківскім варіантї русиньского языка.